Հունիսի 13-ի բիզնես լուրերը

Երևանն առաջատար է բնակարանների առքուվաճառքի գործարքների թվով

ՀՀ վիճակագրական կոմիտեի հրապարակած տվյալների համաձայն՝ 2025 թվականի ապրիլին բազմաբնակարան շենքերի բնակարանների առքուվաճառքի ընդհանուր գործարքների թիվը կազմել է 1,662: Դրանց զգալի մասը՝ 1,289 գործարք կամ 77.6%-ը, կատարվել է Երևանում։ Մյուս մարզերի կտրվածքով Սյունիքում իրականացվել է 37, Կոտայքում՝ 89, Շիրակում՝ 62, իսկ Վայոց Ձորում՝ 12 գործարք, ինչը կազմում է ընդհանուրի 0.7%-ը։

ԿԲ նախագահը քննարկումներ է անցկացրել ԱՄՀ պատվիրակության հետ

Կենտրոնական բանկի նախագահ Մարտին Գալստյանն ընդունել է Արժույթի միջազգային հիմնադրամի հայաստանյան առաքելության պատվիրակությանը, որի ղեկավարն է Ալեքսանդր Թիմանը։ Հանդիպմանը ներկայացվել է առաքելության այցի նպատակը, քննարկվել են ներկայիս մակրոտնտեսական զարգացումները, ֆինանսական շուկայի իրավիճակը, դրամավարկային և մակրոպրուդենցիալ քաղաքականությունները, ինչպես նաև գլոբալ ու տարածաշրջանային ռիսկերը և դրանց հնարավոր ազդեցությունը Հայաստանի մակրոտնտեսական ու ֆինանսական միջավայրի վրա։

ՀՀ-ից Վրաստան ուղևորափոխադրումների նոր կարգ՝ հուլիսի 1-ից

2025 թվականի հուլիսի 1-ից ուժի մեջ կմտնի ՀՀ-ից Վրաստան և հակառակ ուղղությամբ ոչ կանոնավոր ուղևորափոխադրումների նոր կարգավորումը։ Տրանսպորտի և կապի նախարարության տվյալներով՝ նման փոխադրումների համար պարտադիր կլինի ուղևորների ցուցակի առկայությունը՝ լրացված էլեկտրոնային եղանակով։ Այդ ցուցակի տպագիր օրինակը վարորդի մոտ պետք է լինի ողջ ուղևորության ընթացքում։

Բնակարանային նոր օգնության ծրագիր Արցախից բռնի տեղահանվածների համար

Հայաստանը նախատեսում է թարմացնել սոցիալական էլեկտրոնային հարթակը, որի միջոցով Արցախից բռնի տեղահանվածները կարող են բնակարանային աջակցության հայտ ներկայացնել։ Դիմորդները կարող են ընտրել տարբերակներից մեկը՝ բնակարան կամ առանձնատուն գնելը, տուն կառուցելը կամ առկա հիփոթեքի մարումը։ Աջակցության չափը ընտանիքի յուրաքանչյուր անդամի համար սահմանվում է 2-5 մլն դրամի շրջանակում, կախված բնակության վայրից. հեռավոր բնակավայրերում աջակցությունը ավելի բարձր է, իսկ Երևանում այն չի տրամադրվում։

Ապրիլի վերջին ՀՀ պետական պարտքը կազմել է 13․6 մլրդ դոլար

Վիճակագրական կոմիտեի տվյալներով՝ 2025 թվականի ապրիլի 30-ի դրությամբ Հայաստանի պետական պարտքը կազմել է 13.6 մլրդ ԱՄՆ դոլար։ Դրանից 7.06 մլրդ դոլարը արտաքին պարտքն է, իսկ 6.55 մլրդ դոլարը՝ ներքին պարտքը։

Նավթի և ոսկու գները աճել են Մերձավոր Արևելքում լարվածության պատճառով

Bloomberg-ի փոխանցմամբ՝ նավթի գներն աճել են 13%-ով այն բանից հետո, երբ Իսրայելը հարվածներ է հասցրել Իրանին։ Brent տեսակի նավթի գինը գերազանցել է 78 դոլարը մեկ բարելի համար։ Միաժամանակ ոսկու գինը բարձրացել է՝ հասնելով 3,500 դոլարի մեկ ունցիայի դիմաց՝ մոտենալով ռեկորդային մակարդակին։

ԵՄ-ում կքննարկվեն արդյունաբերության ռազմականացման նոր միջոցառումները

Եվրահանձնաժողովը պատրաստվում է ներկայացնել եվրոպական արդյունաբերության ռազմականացմանն ուղղված նոր միջոցառումների փաթեթ։ ԵՄ դիվանագիտական ծառայության ղեկավար Կայա Կալլասի խոսքով՝ քննարկվող ռազմավարության շրջանակում նախատեսվում է ներգրավել մինչև 800 միլիարդ եվրոյի փոխառու միջոցներ, այդ թվում՝ 150 միլիարդ եվրոյի ներդրումներ եվրոպական պաշտպանական արդյունաբերության ոլորտում։

ԵՄ միջուկային ծրագրերը պահանջում են հսկայական ներդրումներ

Եվրոպական միության երկրների միջուկային էներգետիկայի ընդլայնման ծրագրերը ենթադրում են 241 միլիարդ եվրոյի ներդրում՝ մինչև 2050 թվականը միջուկային հզորությունը 98 ԳՎ-ից հասցնելու մինչև 109 ԳՎ-ի։ Դրանից 205 միլիարդ եվրոն նախատեսված է նոր ատոմակայանների կառուցման, իսկ 36 միլիարդ եվրոն՝ գործող ռեակտորների աշխատանքի ժամկետը երկարաձգելու համար։

Suzuki-ն դադարեցրել է Swift-ի արտադրությունը՝ հումքի սահմանափակումների հետևանքով

Չինաստանի կողմից հազվագյուտ մետաղների արտահանման սահմանափակումների արդյունքում Suzuki-ն դադարեցրել է Swift մոդելի արտադրությունը։ Չինաստանի կառավարությունը ապրիլից սահմանափակել էր յոթ տեսակի հազվագյուտ մետաղների արտահանումը՝ ի պատասխան ԱՄՆ մաքսային տուրքերի, ինչը սկսել է անդրադառնալ ԱՄՆ-ի և Եվրոպայի արտադրողների վրա։

ԱԺ հանձնաժողովը մերժել է զինծառայությունից գումարի դիմաց ազատման նախագիծը

ԱԺ պաշտպանության և անվտանգության հարցերի մշտական հանձնաժողովը բացասական եզրակացություն է տվել «Քաղաքացիական պայմանագիր» խմբակցության պատգամավոր Հայկ Սարգսյանի հեղինակած նախագծին, որը նախատեսում էր 2 տարվա պարտադիր զինծառայությունից գումարի դիմաց ազատում։ Հանձնաժողովի նախագահ Անդրանիկ Քոչարյանը առաջարկել էր հետաձգել նախագծի քննարկումը, սակայն Հայկ Սարգսյանը հայտարարել է, որ հետ չի քաշելու նախագիծը։