Netflix հոսքային հարթակը հեռացրել է իր հավելվածը Ռուսաստանի App Store-ից և Google Play-ից։ Այժմ, երկու հարթակներում որոնման տողում  ծառայության անունը մուտքագրելիս, հավելվածը չի ցուցադրվում, ուստի այն չեք կարող ներբեռնել։ Մարտի 6-ին Netflix-ը  հայտարարեց, որ դադարեցնում է գործունեությունը Ռուսաստանում՝ Ուկրաինայում ստեղծված իրավիճակով պայմանավորված։ Մինչ այդ պարզ էր դարձել, որ ընկերությունը դադարեցրել է աշխատանքները ռուսական արտադրության նախագծերի վրա։ Դրանցից են Սվետլանա Խոդչենկովայի և Ֆյոդոր Բոնդարչուկի հետ «Աննա Կ» դրամատիկական սերիալը, Ալեքսանդր Պետրովի «Օղակը», Յուրի Բորիսովի հետ «Ոչ մի առանձնահատուկ բան» և Դարիա Ժուկի «Զատո» քրեական թրիլլերը։Դրանից զատ, ընկերությունը հրաժարվել է հեռարձակել 20 ռուսական հեռուստաալիքներ, որոնց պարտադիր հեռարձակումը Ռուսաստանի օրենսդրությամբ սահմանված է մարտի 1-ից։ Netflix-ը Ռուսաստանում հասանելի է դարձել 2016 թվականի սկզբին, իսկ ծառայության ռուսալեզու տարբերակը գործարկվել է 2020 թվականին։ Երկրում ծառայության օպերատորն է ՝ National Media Group-ը (NMG):