Team Telecom Armenia-ն ապագա ներդրողներին ներկայացրեց Կայուն զարգացման պարտատոմսերը
Team Telecom Armenia-ն հայտարարեց Կայուն զարգացման պարտատոմսերի թողարկման մասին՝ նպատակ ունենալով ներդրողներին առաջարկել նոր հնարավորություն՝ մասնակցելու ընկերության ապագա ռազմավարական ծրագրերին: Միջոցառմանը, որը կազմակերպվել էր ընկերության կողմից, ներկայացվեցին պարտատոմսերի թողարկման մանրամասները, ինչպես նաև բիզնեսի զարգացման ուղղությունները: Ընկերությունը թողարկել է դոլարային և դրամային պարտատոմսեր ընդհանուր 75 միլիոն ԱՄՆ դոլար ծավալով: Ներգրավված միջոցներն ուղղվելու են բջջային և ֆիքսված ցանցերի զարգացմանը, Team Energy էլեկտրական մեքենաների լիցքավորման կայանների ենթակառուցվածքների ընդլայնմանը և վարկերի ամբողջական վերաֆինանսավորմանը: Team Telecom Armenia-ի գլխավոր տնօրեն Հայկ Եսայանը նշեց, որ սա վճռորոշ քայլ է Հայաստանի հեռահաղորդակցության ոլորտի արդիականացման ուղղությամբ։ «Այս պարտատոմսերը մեզ հնարավորություն են տալիս ոչ միայն շարունակել մեր բիզնեսի ընդլայնումը, այլև խթանել հեռահաղորդակցության ենթակառուցվածքների կայուն զարգացմանը՝ միաժամանակ ներգրավելով ներդրողներին այս գործընթացում»,- հավելեց նա: Պարտատոմսերի արժեկտրոնային տոկոսադրույքները կազմել են 7.85%-ից մինչև 11.5%, իսկ շրջանառության ժամկետները՝ 48-60 ամիս։ Դրամային պարտատոմսերի ընդհանուր ծավալը 3.9 միլիարդ դրամ է՝ 11.5% արժեկտրոնային տոկոսադրույքով: Team Telecom Armenia-ն առանձնահատուկ ուշադրություն է դարձնում կայուն զարգացման խնդիրներին: Ընկերությունը պարտավորվել է մինչև 2029 թվականը կրճատել իր գործունեության հետևանքով արտանետումները 40%-ով: Վերջին տարիներին ներդրված բնապահպանական կառավարման համակարգը թույլ է տվել զգալիորեն նվազեցնել շրջակա միջավայրի վրա ազդեցությունը: Միջոցառմանը ներկա էին պետական պաշտոնյաներ, ֆինանսաբանկային ոլորտի ներկայացուցիչներ, դիվանագիտական կորպուսի անդամներ և Team Telecom Armenia-ի գործընկերները: Ամերիաբանկը, որը հանդես է գալիս որպես պարտատոմսերի տեղաբաշխող, ընդգծել է այս նախաձեռնության բացառիկ նշանակությունը, հատկապես ESG (բնապահպանական, սոցիալական և կառավարման) սկզբունքների իրականացման առումով: https://youtu.be/DaXRtRe0urQ Team Telecom Armenia-ի Կայուն զարգացման պարտատոմսերի թողարկումը ցույց է տալիս ընկերության նորարարական մոտեցումները և հավատարիմ դիրքորոշումը՝ նպաստելու Հայաստանի թվային ապագայի կայուն զարգացմանը: