Անցնող շաբաթվա այլ կարևոր իրադարձությունները ֆինանսական շուկաների համար Եվրագոտու երկրներում գնաճը տարեկան կտրվածքով դեկտեմբերին երրորդ ամիսն անընդմեջ աճել է՝ հասնելով 2.4%-ի։ Շուկայի մասնակիցներն այժմ սպասում են, որ Եվրոպական կենտրոնական բանկն այս տարվա ընթացքում մի քանի անգամ կկրճատի վերաֆինանսավորման տոկոսադրույքը՝ 3%-ից նվազեցնելով մինչև 2%։ ԱՄՆ 30 տարեկան հիփոթեքային վարկերի միջին տոկոսադրույքը շաբաթվա վերջում հասել է 6.93%-ի՝ գրանցելով վերջին 6 ամիսների առավելագույն ցուցանիշը։ Վարկերի բարձր տոկոսադրույքները և բնակարանների գների աճը կարող են առաջիկայում կրճատել շուկայի պոտենցիալ գնորդների թիվը։ ԱՄՆ աշխատանքի դեպարտամենտի զեկույցի համաձայն դեկտեմբերին երկրում աշխատատեղերի թիվն ավելացել է 256,000-ով, իսկ գործազրկության մակարդակը 4.2%-ից նվազել է մինչև 4.1%, ինչը ենթադրում է, որ Դաշնային պահուստային համակարգն այս ամիս տոկոսադրույքներն անփոփոխ կթողնի։ ՄԱԿ-ի հրապարակած զեկույցի համաձայն 2025թ.-ին համաշխարհային տնտեսական աճը կկազմի 2.4%՝ անփոփոխ մնալով 2024թ.-ի համեմատ։ Զեկույցում նշվում է, որ Չինաստանի և ԱՄՆ-ի համար դրական, բայց դանդաղ աճը կլրացվի Եվրամիության, Ճապոնիայի և Բրիտանիայի համեստ, և որոշ խոշոր զարգացող տնտեսությունների, հատկապես Հնդկաստանի և Ինդոնեզիայի, կայուն ցուցանիշներով: Բրիտանական ֆունտ-սթերլինգի փոխարժեքը դոլարի նկատմամբ հասել է 2023թ.-ի դեկտեմբերից ի վեր ամենացածր մակարդակին՝ 1.2305 դոլարի, ինչը պայմանավորված է գլոբալ պարտատոմսերի մասսայական վաճառքի արդյունքում Մեծ Բրիտանիայի կառավարության պարտքի ծախսերի աճով։ finarm.am