Ինչպես է զարգացել անշարժ գույքի շուկան 2024-ին. գործարքների թվի և գների փոփոխությունները Հայաստանի անշարժ գույքի շուկան 2024 թվականին գրանցել է զգալի ակտիվություն՝ նախորդ տարվա համեմատ աճելով 12.9%-ով։ Ընդհանուր առմամբ կնքվել է 247,916 գործարք, որոնց գերակշիռ մասը կենտրոնացած է եղել Երևանում և Կոտայքի մարզում։

Առքուվաճառքի շուկայի զարգացում

Տարվա ընթացքում առքուվաճառքի գործարքների թիվը կազմել է 57,796, որոնցից 17,853-ը՝ մայրաքաղաքում։ 2023-ին այս ցուցանիշը 50,059 էր, ինչը վկայում է անշարժ գույքի շուկայի շարունակական զարգացման մասին։ Մարզերում առավել ակտիվ են եղել Տավուշի, Կոտայքի և Արագածոտնի մարզերը, հատկապես գյուղական բնակավայրերում։ Բազմաբնակարան շենքերում բնակարանների գները ևս աճել են։ Մասնավորապես՝ Երևանի Կենտրոն վարչական շրջանում մեկ քառակուսի մետրի միջին գինը բարձրացել է 905,600 դրամից մինչև 1,123,300 դրամ։ Գնաճ է արձանագրվել նաև Աջափնյակում, Շենգավիթում և Էրեբունիում, ինչը պայմանավորված է ենթակառուցվածքների բարելավմամբ և բնակարանների նկատմամբ պահանջարկի բարձրացմամբ։

Վարձակալության և հիփոթեքային շուկայի աշխուժացում

Վարձակալության շուկան նույնպես ակտիվ է եղել. 2024 թվականին կնքվել է 12,529 վարձակալության գործարք, որոնցից 7,442-ը՝ Երևանում։ Հասարակական նշանակության տարածքների վարձակալության գործարքները կազմել են 7,056։ Հիփոթեքային վարկավորման ծավալներն աճել են 38.8%-ով՝ 2023 թվականի 3,451 գործարքներից հասնելով 4,789-ի։ Սա վկայում է, որ բնակարան ձեռք բերելու համար վարկավորման հնարավորություններն ընդլայնվել են, ինչը, իր հերթին, խթանել է շուկայի զարգացումը։

Օտարերկրյա ներդրումների ակտիվացում

Արտասահմանյան քաղաքացիների կողմից անշարժ գույքի գնման գործարքներն աճել են. 1,586 օտարերկրյա գնորդներ, հիմնականում Ռուսաստանից, ԱՄՆ-ից և եվրոպական երկրներից, ձեռք են բերել բնակարաններ և հողամասեր։ Միևնույն ժամանակ, օտարերկրյա քաղաքացիների կողմից վաճառված գույքի թիվը կազմել է 2,452։ *** 2024 թվականին Հայաստանի անշարժ գույքի շուկան ցույց է տվել կայուն աճ՝ պայմանավորված բնակարանների նկատմամբ պահանջարկի ավելացմամբ, ենթակառուցվածքների զարգացմանը, ինչպես նաև օտարերկրյա ներդրումների ակտիվացմամբ։ Վարձակալության, հիփոթեքային վարկավորման և առքուվաճառքի գործարքների զգալի ավելացումը հուշում է, որ շուկան շարունակում է մնալ գրավիչ ինչպես տեղացի, այնպես էլ օտարերկրյա ներդրողների համար։   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: