Հնդկաստանում գտնվող 104 ՀՀ քաղաքացի վերադարձել է Երևան․ ՀՀ ԱԳՆ

Դեսպանությունը բոլորի հետ պահպանում է ամենօրյա կապ և հրատապ մեկնելու ցանկության դեպքում առաջարկում է դիտարկել առկա տարբեր ուղղությունները։

ՀՀ ԱԳՆ խոսնակ Անի Բադալյանը հայտնել է, որ վերջին օրերին Հնդկաստանում ՀՀ դեսպանությունը գործել է արտակարգ ռեժիմով՝ Մերձավոր Արևելքում իրավիճակի սրման և չվերթների չեղարկման պայմաններում։

Դեսպանությունը կապ է պահպանել հավատարմագրման երկրներում՝ հիմնականում զբոսաշրջային նպատակներով Հնդկաստանում և Շրի Լանկայում գտնվող ՀՀ քաղաքացիների հետ, հավաքագրել անհրաժեշտ տեղեկություններ և դիտարկել նրանց վերադարձի հնարավորությունները։

Նշվում է, որ դեսպանությունը հետևողական աշխատանք է իրականացրել համապատասխան թռիչքի թույլտվություն ստանալու ուղղությամբ՝ Հնդկաստանի ավիացիայի նախարարության և ԱԳՆ հետ փոխգործակցությամբ։

Մարտի 5-ի ուշ երեկոյան Հնդկաստանում անցկացված «Seaside Startup Summit»-ի մասնակիցներն ու «Vardan Travel» զբոսաշրջային խմբի անդամները՝ ընդհանուր 104 ՀՀ քաղաքացի, Գոայից մեկնել են Երևան։ Ինքնաթիռն արդեն վայրէջք է կատարել «Զվարթնոց» օդանավակայանում։

Դեսպանության հետ կապ հաստատած քաղաքացիներ

Այս պահին դեսպանության հետ կապ է հաստատել՝

  • Շրի Լանկայից՝ 12 ՀՀ քաղաքացի,

  • Գոայից՝ 6 քաղաքացի,

  • Մալդիվներից՝ 2 քաղաքացի։

Դեսպանությունը բոլորի հետ պահպանում է ամենօրյա կապ և հրատապ մեկնելու ցանկության դեպքում առաջարկում է դիտարկել առկա տարբեր ուղղությունները։

Հնդկաստանում ՀՀ դեսպանության հետ կապի համար նշված է հետևյալ հեռախոսահամարը՝ +32 493 88 00 88 (նաև WhatsApp)։