1000 դրամ՝ 5500 դրամի փոխարեն․ «Զինապահ» հիմնադրամին ուղղվող գումարները կկրճատվեն

Առողջապահության պարտադիր ապահովագրության օրենսդրական նախագիծը դեռևս ընդունված չէ։

Առողջապահական համընդհանուր ապահովագրության վճարների բեռը թեթևացնելու նպատակով նախատեսվում է «Զինապահ» հիմնադրամին ուղղվող գումարները կրճատել՝ վերադառնալով նախկին արժեքներին․ 1000 դրամ մինչև 1 մլն դրամ ստացողների համար այժմ գործող 5500 դրամի փոխարեն։ Այս մասին, այսօր՝ նոյեմբերի 5–ին, հայտնեց ՀՀ վարչապետ Նիկոլ Փաշինյանը առողջապահության նախարար Անահիտ Ավանեսյանի հետ ուղիղ եթերում քննարկման ժամանակ։

Նախատեսում են նաև հայտարարագիր լրացրած անձանց առողջապահական ծախսերի գծով սոցիալական կրեդիտների փոխհատուցումը բարձրացնել և ամսական 6000 դրամ վերադարձնել քաղաքացիներին։

«Երբ քաղաքացին համընդհանուր առողջապահական ապահովագրության շրջանակներում օգտվի որևէ բժշկական ծառայությունից, նրան SMS հաղորդագրություն կուղարկվի՝ ինչքան է վճարվել այդ ծառայության համար»,- առաջարկեց Փաշինյանը։

Անահիտ Ավանեսյանը կարևորեց քաղաքացիների վերահսկողությունը կատարված գործընթացների նկատմամբ։

«Մենք այսօր դրա մի մասն արել ենք․ քաղաքացին իր հավելվածում տեսնում է, որ այց գրանցվեց իր անունով, և տեսնում է՝ պետպատվերով ինչքան գումար է փոխանցվել։ Հիմա ձեր առաջարկով հաղորդագրություն կպատրաստենք, որ ուղիղ գա այդ անձին, ոչ թե ինքը մտնի, նայի համակարգում»,- նշեց Ավանեսյանը։

200 000 դրամից բարձր ստացողները, ըստ նախարարի, 2026 թվականից կվճարեն ամսական 10 հազար 800 դրամ առողջապահական ապահովագրության համար։ Նախատեսվում է նաև ապահովագրության շրջանակներում տարեկան ստուգումներն անցնելը դարձնել պարտադիր։

«Եթե մի տարի չի անցել, հաջորդ տարի կգնա, կանցնի ստուգումները, նոր տարեկան փաթեթը կավելանա»,- նշեց Ավանեսյանը։

Հիշեցնենք, որ առողջապահության պարտադիր ապահովագրության օրենսդրական նախագիծը դեռևս ընդունված չէ։ Այն դեռ պետք է քննարկվի Ազգային ժողովում։