Անցնող շաբաթվա այլ կարևոր իրադարձությունները ֆինանսական շուկաների համար

JP Morgan-ը ԱՄՆ նոր մաքսային քաղաքականության ֆոնին բարձրացրել է ԱՄՆ-ի և համաշխարհային տնտեսական անկման հավանականությունը մինչև 60%՝ նախապես հայտարարված 40%-ի փոխարեն։ ԱՄՆ-ի տնտեսական անկման հավանականությունը բարձրացրել են նաև S&P Global-ը և Goldman Sachs-ը։ ԱՄՆ-ում մարտ ամսվա ընթացքում ավելացել է 228,000 աշխատատեղ. գործազրկության մակարդակը կազմել է 4.2%: Աշխատողների միջին ժամային վարձատրությունը ամսական կտրվածքով աճել է 0.3%-ով, տարեկան կտրվածքով՝ 3.8%-ով։ Համաշխարհային ֆոնդային շուկաները կտրուկ անկում են գրանցել Չինաստանի կողմից, ի պատասխան ԱՄՆ մաքսային քաղաքականության, ամերիկյան ապրանքների նկատմամբ 34% լրացուցիչ մաքսատուրքեր սահմանելու մասին հայտարարությունից հետո։ Շաբաթվա ընթացքում Nasdaq Composite-ը նվազել է 10.02%-ով, S&P 500-ը՝ 9.08%-ով, Dow Jones-ը՝ 7.86%-ով։ Եվրագոտու երկրներում մարտ ամսին գնաճը տարեկան կտրվածքով կազմել է 2.2% նախորդ ամիս գրանցված 2.3% գնաճից հետո, ինչը մեծացնում է հավանականությունը, որ ապրիլի վերջին կայանալիք նիստին Եվրոպական կենտրոնական բանկը կրկին կնվազեցնի վերաֆինանսավորման տոկոսադրույքը։ ԱՄՆ ծառայությունների ոլորտը մարտ ամսին նվազել է՝ պայմանավորված այն սպասումներով, որ ներմուծման մաքսատուրքերի պատճառով առաջացած անորոշության պայմաններում ԱՄՆ-ն տնտեսական աճ չի գրանցի առաջին եռամսյակում: Ծառայությունների ոլորտի PMI ինդեքսը կազմել է 50.8՝ գրանցելով վերջին 9 ամիսների նվազագույն ցուցանիշը։ finarm.am   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: