Հայաստանի դրամաշրջանառության պատմության ցուցահանդես Ստեփանավանում Ստեփանավանի Սոս Սարգսյանի անվան մշակույթի պալատում բացվեց Հայաստանի դրամաշրջանառության պատմությանը նվիրված ցուցահանդեսը: Կենտրոնական բանկի խորհրդի անդամ Հասմիկ Ղահրամանյանը իր ողջույնի խոսքում նշեց, որ արդեն ավանդույթ դարձած ցուցահանդեսները, բացի մարզկենտրոններից, կազմակերպվում են նաև խոշորացված համայնքներում։ Նա կարևորեց մարզերում տարբեր հարթակներով Կենտրոնական բանկի վերաբերյալ տեղեկատվության լայն տարածումը, հավելելով, որ ցուցահանդեսի այցելուները հնարավորություն ունեն ոչ միայն ծանոթանալու դրամաշրջանառության պատմությանը, այլ նաև ԿԲ հիմնական գործառույթներին։ Հասմիկ Ղահրամանյանը նշեց, որ ցուցահանդեսը ԿԲ մասին տեղեկանալու, ինչպես նաև տարբեր հարցադրումների պատասխաններ ստանալու համար «անկաշկանդ» ու հասանելի միջոց է։ Նա շեշտեց, որ ցուցահանդեսի ծրագրում ներառված են նաև զեղծարարությունները կանխելու վերաբերյալ ֆինանսական կրթման նյութեր։ https://youtu.be/Z7GddjN7poc Ստեփանավանի համայնքապետարանի աշխատակազմի ղեկավար Հասմիկ Մովսիսյանը շնորհակալություն հայտնեց Կենտրոնական բանկին ցուցահանդեսի կազմակերպման նախաձեռնության համար և նշեց համայնքային իշխանությունների աջակցության մասին։ Ցուցահանդեսի այցելուների համար կազմակերպվեց շրջայց, ներկայացվեցին պատմական և ժամանակակից դրամները, Կենտրոնական բանկի գործունեությունը, իսկ երեխաների համար տեղի ունեցավ Արփի Մաղաքյանի «Տիգրան Մեծի հեքիաթը» գրքի շնորհանդեսը։ Կենտրոնական բանկը շարունակաբար կազմակերպում է նմանատիպ ցուցահանդեսներ ՀՀ տարբեր մարզերում՝ ներկայացնելով հայկական դրամի պատմությունը և նրա կարևորությունը:   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: