Աշխարհի բնակչության աճի տեմպը, 1950 թվականի վիճակագրության սկզբից ի վեր առաջին անգամ, նվազել է տարեկան մեկ տոկոսից ցածր: Հայտնում է «Երկրի բնակչություն» գերմանական հիմնադրամը: Փորձագետները վերլուծել են ՄԱԿ-ի ժողովրդագրական վիճակագրությունը և եզրակացրել, որ այդ ցուցանիշը կազմում է 0,8 տոկոս: Միաժամանակ, աշխարհում կյանքի տևողությունը, 2019 թվականի համեմատությամբ, նվազել է 1,8 տարով` մինչև 71 տարի: Սա առաջին հերթին պայմանավորված է կորոնավիրուսային համաճարակով, բացատրում են հիմնադրամի վերլուծաբանները: Այդ անկումը չի նշանակում համաշխարհային ժողովրդագրական միտումների փոփոխություն` ընդգծում են հաշվարկների հեղինակները: Աշխարհի բնակչությունը ներկայում ավելանում է տարեկան մոտ 66 միլիոն մարդով կամ օրական 180.000-ով: Ընթացիկ կանխատեսման համաձայն` 2080-ականներին բնակչության թիվը կհասնի գագաթնակետին` մոտ 10,4 միլիարդ մարդ:
