Հայաստանում սահմանափակ պատասխանատվությամբ ընկերությունները տարին մեկ անգամի փոխարեն կարող են ընկերության մասնակիցների միջև շահույթի բաշխումն իրականացնել եռամսյակը մեկ անգամ,- գրում է ejc.am-ը։
«Սահմանափակ պատասխանատվությամբ ընկերությունների մասին» օրենքում փոփոխություն կատարելու մասին օրենքի նախագիծն ԱԺ տնտեսական հարցերի մշտական հանձնաժողովի նիստում ներկայացրեց Էկոնոմիկայի փոխնախարար Ռաֆայել Գևորգյանը:
«Մինչև այս ՍՊԸ-ներն իրավունք ունեին շահույթը բաշխել տարին մեկ անգամ: Դա անհարկի արգելք էր նմանատիպ ընկերությունների համար: Հարկ է նշել, որ ՍՊԸ-ները շատ դեպքերում ընտանեկան բիզնեսներ են, այսինքն՝ սեփականատերերը սահմանափակ քանակով անձինք են՝ շատ դեպքերում փոխկապակցված: Իրականության մեջ բոլորս էլ գիտենք, որ այդ գործընթացը չէր կատարվում տարին մեկ անգամ, այսինքն, երբ սեփականատիրոջը որոշակի գումար էր հարկավոր, նա պարբերաբար դա ստանում էր այլ միջոցներով, կազմակերպությունից ձևակերպվում էին փոխառություններ և այլն»,-ասաց փոխնախարարը:
Գերատեսչությունը համարել է, որ նման օրենսդրական արգելքն անտեղի է, և փոփոխությամբ առաջարկում են, որ ոչ ավելի, քան եռամսյակը մեկ թույլ տան ընկերություններին իրենց կազմակերպության ստեղծած շահույթը բաշխել սեփականատերերի մեջ: Այսպիսով՝ սահմանվում է, որ ընկերությունն իրավունք ունի ոչ հաճախ, քան եռամսյակը մեկ անգամ իրականացնել իր շահույթի բաշխում ընկերության մասնակիցների միջև:
Ըստ փոխնախարարի՝ սա կօգնի փոքր ու միջին ձեռնարկություններին ավելի ճկուն լինել:
ԱԺ հանձնաժողովը հավանություն տվեց ներկայացված օրենքի նախագծին, այն կքննարկվի լիագումար նիստում:
Մեկնաբանություն