Հայաստանի բանկերի միությունն ամփոփել է բանկային համակարգի կիսամյակային արդյունքը

Հայաստանի բանկերի միությունը ամփոփել է բանկային համակարգի 2022թ առաջին կիսամյակի ցուցանիշները: Դրանք վկայում են, որ
այս ամիսներին ընդհանուր ավանդներն ավելացել են մոտ 47 մլրդ դրամով կամ 1.2%-ով՝ կազմելով 4 072 մլրդ դրամ։ Առաջին կիսամյակի վերջի դրությամբ ավանդների դրամով և արտարժույթով մասնաբաժինները շարունակում են մնալ հավասար: Առաջին կիսամյակում ռեզիդենտների ավանդները նվազել են մոտ 17 մլրդ դրամով կամ 0.5%-ով: Ոչ ռեզիդենտների ավանդներն ավելացել են մոտ 65 մլրդ դրամով կամ 7.4%-ով: Դա պայմանավորված է նաև դրամի արժևորմամբ՝ արտարժութային ավանդները դրամով արտահայտված նվազել են: ՀԲՄ գործադիր տնօրենի դիտարկմամբ՝ աշխարհում գնաճային ֆոնի պայմաններում նկատվում է տոկոսադրույքների աճ, սակայն Հայաստանում թե ավանդների, և թե վարկերի տոկոսները էական փոփոխության չեն ենթարկվել: Ըստ այդմ՝ բանկերի տրամադրած վարկերի դրույքները դրամով 2022թ-ի հունիսին 2021թ-ի դեկտեմբերի համեմատ ավելացել է 1.4%-ով: Դոլարով վարկերի դրույքները 2021թ-ի դեկտեմբերի համեմատ ավելացել է 0.2%-ով: