Գերմանիան սահմանել է գազի մատակարարման արտակարգ նախազգուշական ռեժիմի առաջին մակարդակ՝ Ռուսաստանից մատակարարումների հնարավոր ընդհատումների պատճառով,- հայտարարել է Գերմանիայի էկոնոմիկայի նախարար Ռոբերտ Հաբեկը։
Ռեժիմը նախատեսում է գազի սպառման առավելագույն կրճատում և գազի շուկայում իրավիճակի մշտական մոնիտորինգ։ «Ճգնաժամային թիմը վերանայում է մատակարարման իրավիճակը, որպեսզի անհրաժեշտության դեպքում լրացուցիչ միջոցներ ձեռնարկվեն մատակարարման անվտանգության բարելավման համար: Դաշնային կառավարությունն անում է հնարավոր ամեն ինչ, որպեսզի շարունակի ապահովել Գերմանիա մատակարարումների անվտանգությունը»,- Հաբեկի խոսքերն է մեջբերում Die Welt-ը։ Նրա խոսքով, այս պահին մատակարարման հետ կապված խնդիրներ չկան, Գերմանիայում բոլոր սպառողներին գազ է մատակարարվում, սակայն ներկա պայմաններում Գերմանիայի իշխանությունները անհրաժեշտ են համարում խստացնել նախազգուշական միջոցները։ «Այսուհետ յուրաքանչյուր գազ սպառող՝ բիզնեսից մինչև մասնավոր տնային տնտեսություններ, նույնպես պարտավոր են հնարավորինս նվազեցնել սպառումը», — նշել է Հաբեկը։
