Եթե երազանքներին ամուր կառչած մնաք, ապա դրանք մի օր անպայման իրականություն կդառնան, վստահեցնում է Հայաստանում Չինաստանի դեսպանը, որը այսօր հյուրընկալվել էր Թումո: Մի խումբ հայ դպրոցականներ տեխնոլոգիական կենտրոնում օնլայն հանդիպեցին այդ պահին «Շենչժու-15» տիեզերանավի անձնակազմի և չինացի տիեզերագնացների հետ։
«Հայաստանում առաջին անգամ է այսպիսի միջոցառում կազմակերվպում: Սա շատ լավ առիթ է հայ երիտասարդներին տիեզերական ոլորտում Չինաստանի ձեռքբերումներին ծանոթացնելու և գիտելիքներ փոխանցելու համար: Քանի որ Հայաստանը և Չինաստանը շատ լավ գործընկերներ և ընկերներ են, մենք փորձում ենք Հայաստանին ներկայացնել մեր երկրի զարգացման փորձը»,- ասաց ՀՀ-ում Չինաստանի Ժողովրդական Հանրապետության դեսպան Ֆան Յոնգը
Տիեզերագնացները թվարկում են անհրաժեշտ իրերի ցանկը, ցույց են տալիս սնունդը, որն ուտելու են տիեզերքում եղած ժամանակ, տալիս տարատեսակ այլ խորհուրդներ: Դպրոցականները լսում են, նկարահանում, հուսով, որ հեռավոր տիեզերքը մի օր կընդունի նաև իրենց:
«Կարծում եմ՝ այս ոլորտի գիտելիքները Հայաստանի համար շատ կարևոր են, քանի որ Հայաստանը նույնպես տիեզերք է արձակել արհեստական արբանյակ: Ես շատ ուրախ եմ, որ այսօր հայ երիտասարդները տեսնում են տիեզերագնացների կյանքը տիեզերանավում, կարծում եմ, որ դա նրանց շատ հետարքիր է»,- ասաց ՀՀ-ում Չինաստանի Ժողովրդական Հանրապետության դեսպան Ֆան Յոնգը
ԿԳՄՍ փոխնախարար Արթուր Մարտիրոսյանն էլ կարևոր է համարում երեխաների մասնակցությունը նմանատիպ երկխոսությանը և նշում՝ միջոցառումը հայ-չինական բարեկամության նշան է:
«Այստեղ մոտ 60 երեխա է մասնակացում, նրանք միանալու են տիեզերական անձնակազմին: Նրանց համար սա մասնագիտական կողմնորոշման շատ լավ առիթ կլինի: Սա հնարավորություն կտա երեխաներին զարգացնել իրենց մտահորիզոնը»,- ասաց ՀՀ ԿԳՄՍ փոխնախարար Արթուր Մարտիրոսյանը:
Առցանց հանդիպմանը տեսակապով միացել էին Շանհայի համագործակցության կազմակերպության 14 երկրի դպրոցականներ:
Մեկնաբանություն