Էլեկտրական շարժիչով աշխատող տրանսպորտային միջոցների ներկրումը խթանելու համար ավելացված արժեքի հարկի (ԱԱՀ) արտոնությունը երկարաձգվել է եւս մեկ տարով,- գրում է banks.am-ը: Համապատասխան որոշումն ընդունվել է կառավարության այսօրվա նիստում։ Էկոնոմիկայի նախարարի տեղակալ Արման Խոջոյանն ասել է, որ գործող օրենքով նշված տրանսպորտային միջոցներն ազատված են ավելացված արժեքի հարկ վճարումից մինչեւ 2024 թվականի հունվարի 1-ը։ «Նախագծով նախատեսվում է ԱԱՀ-ից ազատման արտոնությունը երկարաձգել մինչեւ 2025-ի հունվարի 1-ը»,-ասել է փոխնախարարը։ Նա նշել է, որ վերջին 2 տարում էլեկտրական շարժիչով աշխատող տրանսպորտային միջոցների ներմուծման ծավալներն աճում են. «2022-ին ներմուծման ծավալը 2021 թվականի համեմատ աճել է 1,8 անգամ, 2020-ի համեմատ՝ շուրջ 12 անգամ, էլեկտրական շարժիչով մոտոցիկլետների եւ մոպեդների ներմուծման ծավալը 2022-ին 2021-ի համեմատ աճել է 3,8 անգամ»։