Անկանխիկ եղանակով վճարումներից կենսաթոշակառուներին և նպաստառուներին հետվճար տրամադրելու գործընթացը նախատեսվում է երկարաձգել ևս 6 ամսով ՝ մինչև 2023-ի հուլիսի 1-ը: Ծրագիրը մեկնարկել էր այս տարվա հուլիսից, քարտով կենսաթոշակ կամ նպաստ ստացողները, եթե այդ գումարը ամսվա ընթացքում անկանխիկ եղանակով էին ծախսում, դրան հաջորդող ամսվա վերջին 10 տոկոսի չափով հետվճար են ստանում, բայց ոչ ավելի, քան 5000 դրամ: Այժմ Աշխատանքի և սոցիալական հարցերի նախարարությունն առաջարկում է ծրագրի սկզբնական փուլում հաստատված տարբերակը, որի ժամկետն այս տարվա ավարտն էր, երկարաձգել ևս 6 ամսով:
Կենսաթոշակառուներն ու նպաստառուները նոյեմբերին իրականացրել են 2.2 մլրդ դրամի անկանխիկ գործարքներ, հետվճարի գումարը կազմել է 185 մլն դրամ, քանի որ որոշ դեպքերում կամ 50 հազար դրամից ավելի գործարք է իրականացվել, կամ մեր երկրից դուրս է փողը ծախսվել: Այս պահին ծրագրին միացել է 4 բանկ, որոնք սպասարկում են կենսաթոշակառուների մոտ 60 տոկոսին: Պետությունը դիտարկում է հետագայում գուցե ձևաչափի որոշ փոփոխություններով, բայց ծրագիրը շարունակական դարձնելու հարցը:
