2025 թվականի հունվարի 1-ից սկսած, հարկերի վճարումը սահմանված ժամկետից ուշացնելու դեպքում հարկ վճարողը կամ հարկային գործակալը կվճարի տույժ 0.075 տոկոսի չափով՝ ներկայիս 0.04 տոկոսի փոխարեն: Այս փոփոխությունը «Հայաստանի Հանրապետության հարկային օրենսգրքում փոփոխություններ կատարելու մասին» օրենքի նախագծով ներկայացրեց ՀՀ պետական եկամուտների կոմիտեի նախագահի տեղակալ Արթուր Մանուկյանը ԱԺ տնտեսական հանձնաժողովի նիստում: Նախագծով կառավարությունը վերանայում է Հարկային օրենսգրքով սահմանված տույժերի չափը, որը կիրառվում է վճարման ուշացման դեպքում: Մինչև 2018 թվականի հունվարի 1-ը ժամկետանց յուրաքանչյուր օրվա համար տույժի չափը կազմում էր ժամանակին չվճարված հարկի գումարի 0.15 տոկոսը՝ մինչև 365 օրվա սահմանափակմամբ: 2018 թվականի հունվարի 1-ից մինչև 2020 թվականի ապրիլի 20-ը տույժը սահմանվեց 0.075 տոկոս՝ մինչև 730 օր: 2020 թվականի ապրիլի 21-ից, տնտեսական գործունեության սահմանափակումների պայմաններում, կորոնավիրուսի տնտեսական հետևանքները մեղմելու նպատակով, տույժը իջեցվեց օրական 0.04 տոկոսի: Սակայն, ըստ Մանուկյանի, ներկայումս այդ պայմանները վերացել են, և անհրաժեշտ է վերականգնել նախկին՝ 0.075 տոկոս դրույքաչափը: Նոր կարգավորումն ուժի մեջ կմտնի 2025 թվականի հունվարի 1-ից: Նախագիծը հանձնաժողովում ստացավ դրական եզրակացություն և կքննարկվի ԱԺ լիագումար նիստում: