Շատ ճշգրիտ տնտեսական օրակարգը այսօր շատ կարեւոր է Հայաստան-Արեւմուտք երկխոսության համատեքստում: Այս մասին, այսօր՝ մարտի 28-ին, ՀՀ ԱԺ-ում հրավիրված մամուլի ասուլիսին նշեց «Եվրանեսթ» ԽՎ-ում ՀՀ ԱԺ պատվիրակության ղեկավար Մարիա Կարապետյանը:
«Երբ խոսում ենք տնտեսության մասին, պետք է նկատի ունենաք, որ սա նաեւ անվտանգության կարեւոր բաղադրիչ է: Հայաստանին արտաքին անվտանգության տեսանկյունից նետվող մարտահրավերները այդ թվում նաեւ տնտեսական են, եւ կարեւոր է, որ մենք նախահարձակ սկսենք զբաղվել սրանով, որքան հնարավոր է ինտենսիվ, որովհետեւ Հայաստանին անհրաժեշտ է դիվերսիֆիկացնել նաեւ իր շուկաները:
Այստեղ իհարկե, մենք կանկնկալեինք Հայաստանի տնտեսվարողների ընդառաջ քայլերը, այդ թվում ապրանքների որակի, ստանդարտների բարձրացման ուղղությամբ, որպեսզի այդ շուկաները ՀՀ արտադրողների համար դառնան հասանելի: Սա ուղիղ կապ ունի անվտանգության հետ թե գեներացված եկամուտների միջոցով մեր անվատնգային կարիքները հոգալու առումով, թե ներդրումային միջավայրի միջոցով անվտանգային հավելյալ երաշխիքներ ՀՀ-ի համար ստեղծելու առումով»,-ասաց նա՝ հույս հայտնելով, որ ապրիլի 5-ին, Հայաստան-ԵՄ-ԱՄՆ սպասվող հանդիպմանը կքննարկվեն նաեւ անվտանգությանը ուղիղ վերաբերող հարցեր եւ Հայաստան-Ադրբեջան կարգավորմանը նպաստելուն վերաբերող հարցեր:
Մարիա Կարապետյանը հայտարարեց, որ այս պահին ԵԱՏՄ-ից դուրս գալու հարց չի քննարկվում:
Իր հերթին, ՔՊ-ական պատգամավոր Բաբկեն Թունյանն ասաց, որ Հայաստանի համար շատ կարեւոր է արտահանման դիվերսիֆիկացումը, իսկ դրա համար տնային աշխտանքի ամենակարեւոր բաղադրիչը սեփական արտադրանքի որակը բարձրացնելն է եւ համապատասխանեցնելը այն շուկաներին, որտեղ ուզում ենք արտահանել մեր արտադրանքը. «Դրա համար պետք է գիտելիքի, ստանդարտների, օրենսդրության բարելավում, նաեւ որոշակի աշխատանք տնտեսվարողների հետ: Մենք հիմա այդ ուղղությամբ շարժվում ենք: Քանի որ ԵԱՏՄ անդամ ենք, ավելի շատ ինտեգրված ենք ԵԱՏՄ-ին, բայց անգամ այդ պարագայում մեզ համար անհրաժեշտություն է մեր արտահանման ճանապարհները դիվերսիֆիկացնել: Մեզ համար ոչ թե Եվրոպական շուկայի դռներն են փակ, այլ մենք աշխատանք։ ունենք անելու, որպեսզի եվրոպական շուկային առաջարկելու բան ունենանք: Այստեղ ԵԱՏՄ-ից դուրս գալու հարցը չէի հակադրի ԵՄ շուկային ինտեգրվելու հարցին»,-ասաց նա:
