OpenAI-ն՝ արագ աճող արհեստական բանականության (ԱԲ) ընկերությունը, որի ստեղծած ChatGPT մոդելը մեծ տարածում ունի, մի շարք նոր քայլեր է ձեռնարկում՝ նպատակ ունենալով ապահովել իր աճող ենթակառուցվածքային պահանջները:
Բարձր տեխնոլոգիական ոլորտում լայնածավալ գործունեություն ծավալելու նպատակով OpenAI-ն համագործակցում է առաջատար ընկերությունների հետ և մշակում սեփական չիպերի դիզայն:
Համագործակցելով Broadcom և Taiwan Semiconductor Manufacturing Company (TSMC) ընկերությունների հետ՝ OpenAI-ն մշակելու է իր առաջին ներքին չիպը, որը կօգտագործվի ԱԲ համակարգերի պահանջների համար: Այս նորարարական քայլը նպատակ ունի ապահովելու մատակարարման հուսալիությունը և նվազեցնելու ծախսերը: Բացի այդ, OpenAI-ն AMD-ի նոր MI300X չիպերը միացնում է Nvidia-ի չիպերի հետ՝ Microsoft Azure-ում իր մոդելների աշխատանքը ավելի արդյունավետ դարձնելու համար։
OpenAI-ն կազմել է մոտ 20 մասնագետից բաղկացած ինժեներական թիմ՝ Google-ում TPU չիպեր մշակած բարձրակարգ ինժեներների ղեկավարությամբ: Այս թիմը կենտրոնացած է OpenAI-ի համար հարմարեցված չիպեր ստեղծելու վրա, ինչն էական է ԱԲ համակարգերի մշակման և գործարկման ծախսերը օպտիմալացնելու համար:
OpenAI-ն սկզբնապես քննարկել էր սեփական գործարանային ցանցի ստեղծման գաղափարը, սակայն, հաշվի առնելով բարձր արժեքն ու իրականացման ժամանակահատվածը, ընկերությունը որոշել է կենտրոնանալ ներքին չիպերի նախագծման և արդյունաբերական գործընկերների հետ աշխատելու վրա՝ ինչպես անում են Amazon-ը, Google-ը և Microsoft-ը։
Նորամուծությունների վերաբերյալ հաղորդագրությունից հետո Broadcom-ի բաժնետոմսերը բարձրացել են ավելի քան 4.5%-ով, իսկ AMD-ի բաժնետոմսերն ավելացել են 3.7%-ով։ Ներդրողների վստահությունն աճում է, քանի որ OpenAI-ն խոշորագույն չիպերի գնորդներից է, և նրա որոշումները կարող են լայն ազդեցություն ունենալ տեխնոլոգիական ոլորտի վրա:
OpenAI-ն չիպերի շուկայի իրադրությունից ելնելով` ձգտում է որոշ տարրեր ձեռք բերել այլ գործընկերներից կամ ինքնուրույն մշակել: Broadcom-ի հետ համագործակցությունը հնարավորություն է տալիս OpenAI-ին արտադրական հզորություն ապահովել TSMC-ի հետ՝ իր առաջին հարմարեցված չիպը թողարկելու համար 2026թ․-ին:
Այս ռազմավարական մոտեցումը կարևոր է, քանի որ ԱԲ-ի ուսուցման և ենթակառուցվածքային մեծ ծախսերը ստիպում են OpenAI-ին շարունակաբար որոնել նորարական լուծումներ՝ մատակարարների բազմազանության ապահովման և ներքին ռեսուրսների զարգացման միջոցով:
Reuters
JavaScript seems to be disabled in your browser. You must have JavaScript enabled in your browser to utilize the functionality of this website.
