2024-ի առաջին կիսամյակում Հայաստանի առևտրաշրջանառությունը գերազանցել է նախորդ տարվա ցուցանիշները

 Ըստ ՀՀ վիճակագրական կոմիտեի ճշտված տվյալների 2024 թվականի հունվար-հուլիս ամիսներին Հայաստանի արտաքին առևտրաշրջանառությունը նախորդ տարվա նույն ժամանակահատվածի համեմատ աճել է 95 տոկոսով՝ կազմելով 20 մլրդ 424.5 մլն ԱՄՆ դոլար։ Հուլիսին՝ հունիսի համեմատ, առևտրաշրջանառությունը կրճատվել է 1.9 տոկոսով, սակայն նախորդ տարվա հուլիսի համեմատ գրանցվել է 35.3 տոկոսի աճ: 2024 թվականի հուլիսին Հայաստանի արտաքին առևտրաշրջանառությունը կազմել է 1 մլրդ 995.6 մլն դոլար: Այս տարվա հունվար-հուլիս ամիսներին Հայաստանից արտահանումը 2023 թվականի նույն ժամանակահատվածի համեմատ աճել է 2.2 անգամ՝ հասնելով 8 մլրդ 738.7 մլն դոլարի: Հուլիսին արտահանումը կրճատվել է 5.7 տոկոսով՝ կազմելով 811.6 մլն դոլար, բայց նախորդ տարվա հուլիսի համեմատ աճել է 42.8 տոկոսով: Ներմուծումը 2024 թվականի առաջին 7 ամիսներին 79.1 տոկոսով գերազանցել է 2023-ի նույն ժամանակահատվածի ցուցանիշը՝ կազմելով 11 մլրդ 685.8 մլն դոլար: Հուլիսին՝ հունիսի համեմատ, ներմուծումը աճել է 0.8 տոկոսով՝ կազմելով 1 մլրդ 184 մլն դոլար, և նախորդ տարվա հուլիսի ցուցանիշը գերազանցվել է 30.7 տոկոսով: Հունվար-հուլիս ամիսներին ԱՄՆ դոլարի միջին փոխարժեքը կազմել է 394.94 դրամ, իսկ հուլիսին՝ 388.07 դրամ: