Google-ը ներկայացրել է արհեստական բանականության նոր գործիք՝ Product Studio–ն, որը կօգնի ձեռներեցներին գովազդել իրենց արտադրանքը,- գրում է News.am Tech-ը։
Ինչպես տեղեկացնում է Techcrunch.com-ը, գործիքը վաճառողներին թույլ կտա անվճար ստեղծել իրենց արտադրանքի լուսանկարները կամ փոխել արդեն արված լուսանկարները՝ առանց նոր ֆոտոշարքի համար վճարելու:
Օրինակ՝ մաշկի խնամքի միջոցներ արտադրողը կարող է արհեստական բանականության միջոցով ստեղծել գոյություն ունեցող կրեմի լուսանկարի նոր տարբերակներ՝ «շրջապատված դեղձերով, հետևի պլանում արևադարձային բույսերով»։ Գործիքը կարող է օգտագործվել նաև շեղող ֆոները հեռացնելու և փոքր կամ ցածր լուծաչափով պատկերների որակը բարելավելու համար:
Google Marketing Live միջոցառման շրջանակում տեղի ունեցած ճեպազրույցի ժամանակ Google-ի Merchant Shopping-ի փոխնախագահ և գլխավոր մենեջեր Մեթ Մադրիգալը նշել է, որ առաջադեմ տեխնոլոգիաները, ներառյալ արհեստական բանականությունը, վաղուց մեծ դեր են խաղում Google Shopping-ի արտադրանքներում, և Product Studio-ն կօգնի այս տեխնոլոգիաները հասցնել նաև փոքր ու միջին բիզնեսին։
Google-ի ներկայացուցիչները նաև ասել են, որ ընկերությունների համար ավելի հեշտ է դարձել իրենց գովազդը Merchant Center Next-ում տեղադրելը: Ապրանքների ներկայացման լրահոսի կարգավորումը նույնպես պարզեցվել է. եթե նախկինում վաճառողները պետք է ձեռքով ավելացնեին իրենց ապրանքները, գները, պատկերները, նկարագրությունները և այլ տվյալներ, ապա Merchant Center Next-ն այժմ կկարողանա ավտոմատ կերպով լրացնել այդ տվյալները՝ օգտվելով վաճառողի կայքում առկա տվյալներից։ Վաճառողները կարող են խմբագրել այս ձևով լրացված տեղեկությունը կամ ամբողջությամբ անջատել այս ֆունկցիան։
Google-ը նաև վաճառողների համար հեշտացնում է իրենց աշխատանքի արդյունավետության վերլուծությունը՝ վերլուծական բոլոր հաշվետվությունները տեղափոխելով Performance ներդիր:
Այս թարմացումով վաճառողները կունենան մեկ ընդհանուր վայր, որտեղ կարելի է ամենավաճառվող ապրանքների մասին տեղեկություններ ստանալ, տեսնել, թե որ ընկերություններն են հայտնվում իրենց բիզնեսի կողքին և նույնիսկ կարող են տեսնել, թե ինչպես են գնորդները փոխազդում իրենց բիզնեսի հետ «Որոնում» և «Քարտեզներ» բաժիններում:
Նշենք, որ ԱՄՆ-ում Product Studio-ն վաճառողներին հասանելի կլինի առաջիկա մի քանի ամիսների ընթացքում: Իսկ թե երբ գործիքը հասանելի կլինի այլ երկրներում, դեռևս հայտնի չէ:
Մեկնաբանություն