Լեհաստանը 2022 թվականի փետրվարից ի վեր Ուկրաինային է փոխանցել 16,4 մլրդ զլոտիի (շուրջ 4,5 մլրդ դոլար) արժողությամբ զենք և ռազմական տեխնիկա։ Այս մասին լրագրողների հետ հանդիպմանը հայտարարել է Լեհաստանի ազգային պաշտպանության նախարար Վլադիսլավ Կոսինյակ-Կամիշը։
Նախարարության ներկայացրած հաշվետվության համաձայն՝ ռազմական մատակարարումների հիմնական մասը՝ 14,9 մլրդ զլոտի (4,1 մլրդ դոլար), Ուկրաինայի զինված ուժերին է փոխանցվել 2022-2023 թվականներին՝ նախորդ՝ «Իրավունք և արդարություն» կուսակցության կառավարության օրոք։ Երկրի ներկայիս իշխանությունների օրոք Կիևին հավելյալ տրամադրվել է 1,5 մլրդ զլոտիի (0,4 մլրդ դոլար) ռազմական աջակցություն։
Patriot հրթիռների մատակարարումը
Պաշտպանական գերատեսչության ղեկավարը նաև պաշտոնապես հաստատել է Patriot զենիթահրթիռային համակարգերի համար նախատեսված հրթիռների փոխանցումը Կիևին։
Կոսինյակ-Կամիշի խոսքով՝ որոշումը կայացվել է ՆԱՏՕ-ի գլխավոր քարտուղարի և Եվրոպայում ԱՄՆ զինված ուժերի հրամանատարության առաջարկով ու խնդրանքով՝ համապատասխան խորհրդակցություններից հետո։ Նախարարը շեշտել է, որ փոխանցված հրթիռների քանակը չի գերազանցում երկրի հնարավորությունների սահմանները և որևէ ազդեցություն չի ունենա Լեհաստանի սեփական հակաօդային պաշտպանության (ՀՕՊ) ներուժի վրա։
