Փալմ Բիչի միջազգային օդանավակայանը տպավորիչ քվեարկությամբ վերանվանվեց Դոնալդ Թրամփի անվան միջազգային օդանավակայան: Այս մասին Truth Social-ի իր էջում գրել է ԱՄՆ նախագահ Դոնալդ Թրամփը:
«Շատ մեծ օր Ֆլորիդայի Փալմ Բիչում, որտեղ իմ մեծ պատիվն էր, որ Փալմ Բիչի միջազգային օդանավակայանը տպավորիչ քվեարկությամբ վերանվանվեց Նախագահ Դոնալդ Թրամփի անվան միջազգային օդանավակայան: Տարածքը թեժ է, գտնվելու վայրը՝ հիանալի, իսկ վերանորոգումը կլինի տպավորիչ: Շնորհակալություն Փալմ Բիչի բոլոր բնակիչներին ձեր քվեի և վստահության համար: Սա շուտով կդառնա աշխարհի ամենամեծ և ամենատպավորիչ օդանավակայաններից մեկը»,- գրել է Թրամփը:
Օդանավակայանը սոցիալական ցանցերում նշել է, որ առայժմ օդանավակայանը կշարունակի օգտագործել PBI կոդը, սակայն օգոստոսի 18-ից այն պաշտոնապես կգրանցվի DJT (Donald J. Trump) նշագրմամբ։
Առանձին հայտարարության մեջ օդանավակայանի այցելուներին նախազգուշացրել են ինչպես օդանավակայանի ֆիզիկական տեսքի, այնպես էլ նրա թվային ռեսուրսների սպասվող փոփոխությունների մասին, սակայն խոստացել են, որ հարմարավետ ճանապարհորդությունների ապահովումը կմնա առաջնահերթություն։
«Այսօրվանից Փալմ Բիչի միջազգային օդանավակայանը պաշտոնապես վերանվանվել է Նախագահ Դոնալդ Թրամփի անվան միջազգային օդանավակայանի։ Չնայած նրան, որ նոր անվանմանն անցնելուն զուգընթաց ցուցանակներն ու բրենդինգը կթարմացվեն, ճանապարհորդության տպավորությունները կմնան նույնը», - գրել է օդանավակայանը սոցիալական ցանցերում։
Ավելի վաղ ԱՄՆ նախագահի անունը ստացել էր նրա կալվածքից դեպի օդանավակայան տանող մայրուղին։ Վաշինգտոնում Թրամփի պատվին վերանվանվել են Խաղաղության ինստիտուտը, ինչպես նաև գլխավոր թատերահամերգային հարթակը՝ Ջոն Քենեդու անվան կատարողական արվեստի կենտրոնը։
