ԱՄՆ նախագահ Դոնալդ Թրամփը համոզմունք է հայտնել, որ Իրանի իշխանությունները հայտնվել են ծայրահեղ ծանր դրության մեջ և պատրաստ են ցանկացած հարցով զիջումների գնալ Վաշինգտոնին։ Այս մասին Սպիտակ տան ղեկավարը գրել է իր «Truth Social» սոցիալական ցանցում՝ միաժամանակ սուր քննադատության ենթարկելով ԱՄՆ Սենատին։
«Իրանն իմ թակարդում է» Դոնալդ Թրամփի պնդմամբ՝ իր վարած քաղաքականության արդյունքում տասնամյակների ընթացքում առաջին անգամ է, որ Թեհրանն այսպիսի ահռելի հարգանք է տածում Միացյալ Նահանգների և անձամբ նախագահի հանդեպ:
Դոնալդ Թրամփի հայտարարությունը. «Իրանն այժմ իմ «թակարդում է» և հոգեվարքի մեջ է. նրանք պատրաստ են ցանկացած զիջման։ Ու հենց այս պահին ԱՄՆ Սենատը որոշում է ռազմական լիազորությունների մասին օրենքի շուրջ բացարձակապես անժամանակ ու անիմաստ քվեարկություն անցկացնել»։
Սպիտակ տան և Սենատի հակամարտությունը Նախագահի զայրույթի պատճառ է դարձել Սենատի ընդունած այն բանաձևը, որով կոչ է արվում սահմանափակել գործադիրի լիազորությունները և դադարեցնել Իրանի դեմ ռազմական գործողություններն առանց Կոնգրեսի հստակ թույլտվության։ Թրամփի ձևակերպմամբ՝ սենատորներն այս քայլով աշխարհի թիվ մեկ ահաբեկչական հովանավորին (Իրանին) ազդակ են հղում, թե իբր Միացյալ Նահանգներին դուր չի գալիս նախագահի գործելաոճը։
«Սա ոչ այլ ինչ է, քան օգնություն ու թիկունք թշնամուն»,- հայտարարել է Սպիտակ տան ղեկավարը՝ հավելելով, որ քվեարկության ժամանակ բանաձևին կողմ են արտահայտվել նաև «չորս ձախողակ հանրապետականներ»։
Չնայած օրենսդիրների հարուցած խոչընդոտներին՝ Թրամփը վստահեցրել է, որ միևնույն է՝ հասնելու է իր նպատակին. «Այդ սենատորները միայն բարդացրին իմ գործը, բայց ես իմ ուզածին կհասնեմ, որովհետև ես միշտ ավարտին եմ հասցնում այն գործը, որը սկսում եմ»։
