ԱՄՆ փոխնախագահ Ջեյ Դի Վենսն անդրադարձել է Իրանի շուրջ ստեղծված իրավիճակին և Վաշինգտոնի հետագա ռազմավարությանը՝ ընդգծելով, որ Թեհրանն այժմ կանգնած է հստակ ընտրության առջև։
«Նրանք ուզո՞ւմ են, որ իրենց տնտեսությունը խեղդվի ապագայում, թե ուզում են ավելի լավ հարաբերություններ ունենալ Արևմուտքի հետ։ Սա միշտ էլ այն տարբերակն է եղել, որը նախագահն առաջարկել է այս տղաներին»,- նշել է Վենսը։
ԱՄՆ փոխնախագահի հայտարարության առանցքային թեզերը․
Տնտեսական ճնշման նոր փուլ․ Վենսի խոսքով՝ Վաշինգտոնն անցել է Իրանի վրա տնտեսական լծակների կիրառման ակտիվ փուլին։ Չնայած Թեհրանի պատասխան ճնշման փորձերին՝ իրականում Իրանն ավելի ծանր վիճակում է հայտնվել։
Միջուկային ենթակառուցվածքների վիճակը․ ԱՄՆ փոխնախագահը հայտարարել է, որ Իրանի միջուկային օբյեկտները ոչնչացված են, և Վաշինգտոնի հիմնական խնդիրն է կանխել դրանց վերականգնումը։
Նոր իրականության ձևավորում․ Սպիտակ տան նպատակն է ստեղծել այնպիսի պայմաններ, որտեղ Իրանը ոչ միայն չի ունենա գործող միջուկային ենթակառուցվածքներ, այլև նույնիսկ փորձ չի կատարի վերականգնել դրանք։
