ԱՄՆ-ի և Վենեսուելայի իշխանությունները ձեռք են բերել նախադեպը չունեցող համաձայնություն էներգետիկ ոլորտում, որը Վաշինգտոնում արդեն անվանել են «պատմության մեջ ամենախոշոր նավթային գործարքը»։
ԱՄՆ պետքարտուղար Մարկո Ռուբիոն X (նախկին Twitter) սոցիալական ցանցում արված հայտարարության մեջ ընդգծել է, որ այս համաձայնագիրը վճռորոշ նշանակություն կունենա հարավամերիկյան երկրի ապագայի համար։
«Վենեսուելայի ժողովրդի համար այս գործարքը կբերի մոտ 100 մլրդ դոլարի մասնավոր ներդրումներ, հազարավոր բարձր վարձատրվող աշխատատեղեր և կնպաստի Վենեսուելայի տնտեսության վերականգնմանը», – նշել է Ռուբիոն։
Ավելի վաղ ԱՄՆ նախագահ Դոնալդ Թրամփը հայտարարել էր, որ գործարքի արդյունքում Վաշինգտոնը վերահսկողություն կստանա Վենեսուելայի ավելի քան 65 միլիարդ բարել հաստատված նավթային պաշարների նկատմամբ։ Ըստ Թրամփի՝ նախագիծն իրականացվելու է մասնավոր հատվածի հետ համագործակցությամբ և «առանց ամերիկացի հարկատուների համար որևէ ծախսի»։
Ակնկալվում է, որ խոշոր մասնավոր ներդրումների և ամերիկյան տեխնոլոգիաների ներգրավումը թույլ կտա արդիականացնել Վենեսուելայի նավթային ենթակառուցվածքները, ապահովել էներգակիրների կայուն մատակարարում և խթանել տարածաշրջանի տնտեսական վերելքը։
