Գերմանիայի գործատուների ասոցիացիան (BDA) և Գերմանիայի արհմիությունների ասոցիացիան (DGB) դեմ են արտահայտվել Ռուսաստանից բնական գազի մատակարարումների էմբարգոյի սահմանմանը, բացատրելով, որ դա սպառնում է դադարեցնել արտադրությունը, ապաարդյունաբերականացնել և կրճատել աշխատատեղերը երկրում,- հաղորդում է ՏԱՍՍ-ը:
Ինչպես ասվում է BDA-ի և DGB-ի ղեկավարներ Ռայներ Դուլգերի և Ռայներ Հոֆմանի կողմից DPA գործակալությանը տված համատեղ հայտարարության մեջ, պատժամիջոցները պետք է թիրախավորված լինեն և հնարավորինս կանխեն սեփական տնտեսության վնասումը: Ընդգծվում է, որ գազի էմբարգոյի ընդունման բացասական հետևանքները շատ ավելի լուրջ կլինեն Գերմանիայի տնտեսության եւ աշխատաշուկայի համար, քան Ռուսաստանի համար։
BDA-ի և DGB-ի ղեկավարները նշել են նաև, որ Ուկրաինային հետագա աջակցություն ցուցաբերելու համար անհրաժեշտ է կայուն տնտեսություն և աշխատաշուկա։ Դուլգերը և Հոֆմանը նշել են, որ Գերմանիան մոտ ապագայում «ավելի շատ խնդիրներ ունի լուծելու», և չի կարող գործել «պահի ազդեցության տակ»։
Ավելի վաղ գերմանական Nahrung Genuss Gaststätte (NGG) սննդի արդյունաբերության արհմիության նախագահ Գիդո Ցայտլերը հայտարարել էր, որ ռուսական գազի մատակարարումների էմբարգոն կհանգեցնի Գերմանիայում սննդամթերք արտադրողների աշխատանքի լայնածավալ ընդհատումների։
