Շվեյցարական UBS և Credit Suisse երկու խոշորագույն և հնագույն բանկերը միաձուլվել են. UBS-ը գնել է Credit Suisse-ին,- գրում է Tagblatt-ը՝ վկայակոչելով երկրի նախագահ Ալեն Բերսեի մամուլի ասուլիսից մեջբերում: Այս մասին հայտնում է fintech.am-ը։
«Դաշնային խորհուրդը ողջունում է UBS-ի Credit Suisse-ի ձեռքբերումը, որը մեծ նշանակություն ունի ոչ միայն Շվեյցարիայի, այլև միջազգային ֆինանսական կենտրոնի համար՝ վստահության վերականգնման տեսանկյունից»,- ասել է Բերսեն ։
Նա նշել է, որ Credit Suisse-ը (CS) լավ կապիտալիզացված էր, սակայն «հաճախորդներն ու ներդրողները կորցրել են վստահությունը» բանկի նկատմամբ։ Արդյունքում, իշխանությունները որոշեցին երկու բանկերին տրամադրել 100 միլիարդ շվեյցարական ֆրանկի ($108 միլիարդ) իրացվելիության երաշխիք՝ ի լրումն 50 միլիարդ ֆրանկ ($54 միլիարդ) վարկի:
UBS-ի հայտարարության մեջ նշվում է, որ գործարքը կնքվել է CS-ի մեկ բաժնետոմսի համար 0,76 շվեյցարական ֆրանկի պայմանով, այսինքն՝ ընդհանուր գումարը կազմել է 3 մլրդ ֆրանկ ($3,24 մլրդ):
Ֆինանսների նախարար Կարին Քելլեր-Սուտերն ասել է, որ երկրի կառավարությունը ճիշտ իրավական դաշտ է ստեղծել CS-ին փրկելու համար՝ երկրի Ազգային բանկին (SNB) տրամադրելով իրացվելիության վարկերի լրացուցիչ դեֆոլտի երաշխիքներ:
Բացի այդ, իշխանությունները 9 միլիարդ դոլար շվեյցարական ֆրանկ (մոտ $10 միլիարդ) են հատկացրել UBS-ին՝ գործարքի շրջանակներում բանկի կրած հնարավոր վնասները փակելու համար:
