Նավթի գինը կտրուկ ընկել է ՝ հասնելով վերջին վեց ամսվա նվազագույն մակարդակին

Brent տեսակի նավթի գինը վեց ամսով իջել է նվազագույնի. սեպտեմբերի 7-ի առավոտյան Լոնդոնի ICE Futures բորսայում հումքի արժեքը նվազել է 1,74%-ով և հասել 91,21 դոլարի ՝ մեկ բարելի դիմաց։ Այս գնով նավթը վերջին անգամ վաճառվել է 2022 թվականի փետրվարի 18-ին։ Փորձագետների կարծիքով ՝ գների անկումը պայմանավորված է Չինաստանում կորոնավիրուսային սահմանափակումներով և մտավախությամբ, որ գների հետագա աճը կհանգեցնի համաշխարհային ռեցեսիայի և կնվազեցնի վառելիքի պահանջարկը։
WTI նավթի ֆյուչերսները Նյու Յորքի ապրանքային բորսայում նույնպես նվազել են ՝ 1,8%-ով ՝ հասնելով 85,33 դոլարի ՝ մեկ բարելի դիմաց։

Ըստ Reuters-ի հարցված փորձագետների, անկումը հիմնականում պայմանավորված է Չինաստանում կորոնավիրուսային սահմանափակումներով և ԱՄՆ-ում ավելի բարձր տոկոսադրույքների ակնկալիքներով: CMC Markets-ի վերլուծաբան Թինա Թանի կարծիքով ՝ նավթը նույնպես գտնվում է դոլարի ուժեղացման ճնշման տակ։