Միջոցառման շրջանակներում աջակցություն է տրամադրվում մշակող արդյունաբերության ոլորտի գործատու առևտրային կազմակերպություններին և անհատ ձեռնարկատերերին։
Աջակցությունը տրամադրվում է աշխատանքային հարաբերությունների առաջին տասներկու ամիսների համար աշխատողների մասով աշխատավարձի և դրան հավասարեցված այլ վճարումների նկատմամբ հաշվարկված եկամտային հարկի չափով։ Նշված աջակցության գումարը, սակայն, յուրաքանչյուր գործատուին մեկ աշխատողի մասով չի կարող գերազանցել 500.000 դրամը՝ տասներկու ամիսների հաշվարկով:
Աջակցության ծրագրին դիմելու համար շահառու առևտրային կազմակերպությունների և անհատ ձեռնարկատերերի դիմումի ներկայացման օրվան նախորդող տարվա շրջանառության առնվազն 80 %-ը պետք է լինի մշակող արդյունաբերություն խմբում ներառված գործունեության տեսակներից։
Միջոցառման շրջանակներում գործատուին աջակցությունը տրամադրվում է այն դեպքում, եթե գործատուի և աշխատողի միջև աշխատանքային հարաբերությունների հաստատման առաջին տասներկու ամիսները ներառված են 2024 թվականի հունվարի 1-ից մինչև 2026 թվականի դեկտեմբերի 31-ն ընկած ժամանակահատվածում։
Աջակցության ծրագրին չեն կարող դիմել այն առևտրային կազմակերպությունները և անհատ ձեռնարկատերերը, որոնք դիմումը ներկայացնելու և (կամ) նախորդող օրացուցային տարիների ընթացքում համարվել են միկրոձեռնարկատիրության սուբյեկտ։
Գործատուն աջակցության ծրագրին կարող է դիմել այն աշխատողների համար, ովքեր․
1․ 2024 թվականի հունվարի 1-ից հետո՝ գրավոր աշխատանքային պայմանագրի հիման վրա աշխատանքային հարաբերությունների մեջ են մտել գործատուի հետ և 12 ամիս անընդմեջ պայմանագիրը չի լուծվել,
2․ աշխատանքային հարաբերությունների մեջ մտնելու օրվան նախորդող 36 ամիսների ընթացքում չեն գտնվել աշխատանքային հարաբերությունների մեջ մշակող արդյունաբերության ոլորտի այլ տնտեսավարողի հետ,
3․ չեն օգտվել կամ չեն օգտվում հիպոթեքային վարկի սպասարկման համար վճարված տոկոսների գումարների չափով վարձու աշխատողների, անհատ ձեռնարկատերերի և նոտարների կողմից կամ ֆիզիկական անձանց կողմից վճարված եկամտային հարկի գումարների վերադարձի իրավունքից,
4․ չեն օգտվել կամ չեն օգտվում վարձու աշխատող հանդիսացող ֆիզիկական անձանց ուսման վարձավճարի փոխհատուցման նպատակով եկամտային հարկի գումարների վերադարձի իրավունքից։
Միջոցառման շրջանակներում աջակցությունը ստանալու նպատակով գործատուն ՊԵԿ հաշվետվությունների ներկայացման էլեկտրոնային համակարգից ներկայացնելու է մշակող արդյունաբերության ոլորտում աշխատողների ներգրավման միջոցառման համաձայն աջակցություն ստանալու դիմում։ Դիմումի ներկայացման վերջնաժամկետը 2027 թվականի մարտի 1-ն է։
Մեկնաբանություն