Սույն թվականի հուլիսի 28-ին Կառավարության նիստում հաստատվել է Կրթության մինչև 2030 թվականի զարգացման պետական ծրագիրը, որը նպատակ է հետապնդում որակապես նոր փուլ տեղափոխել կրթական համակարգի զարգացումը՝ դրա հիմքում դնելով կրթական ծառայությունների մատչելիության, որակի և արդյունավետության ցուցիչները։ Իրապես, այսօր կրթական ոլորտում առկա խնդիրները, սկսած նախադպրոցական ծառայություններից մինչև բարձրագույն ուսումնական հաստատություններ, կրթությունից աշխատաշուկա անցման, ինչպես նաև կրթության շարունակականության ապահովման շրջանակներում բավական զգայուն են, հրատապ և օր առաջ հաղթահարման կարիք ունեն:Սակայն այս ճանապարհին, աչքի առաջ ունենալով նաև ներկայիս սոցիալ-տնտեսական, քաղաքական և տարածաշրջանային իրողությունները, հաջողություն և արդյունք կարող ենք գրանցել միայն այն դեպքում, երբ կա համապարփակ ընկալում հիմնախնդիրների գոյության պատճառների մասին, իսկ առաջարկվող լուծումների փաթեթն իրատեսական է և չափելի։ Հակառակ պարագայում կասկածի տակ կդրվի ոչ միայն ակնկալվող արդյունքը, այլև ծրագրի իրականացման ողջ գործընթացը:
