Վարժական հավաքներից խուսափողները կենթարկվեն պատասխանատվության. մանրամասներ

ՀՀ կառավարությունն ընդունել է որոշում, որն ուղղված է քաղաքաշինության ոլորտում գործարք իրականացնող սուբյեկտների համար իրավահավասար պայմանների ստեղծմանը և ոլորտի արմատական բարեփոխմանը։

Նպատակներից են՝ պատվիրատու-կապալառու հարաբերությունների հստակեցումը, վստահության ամրապնդումը, ծրագրերի գնահատման մեխանիզմների կատարելագործումը, ինչպես նաև BIM (Building Information Modeling) նախագծերի մշակման և կիրառման խթանումը։

Առաջարկվող փոփոխությունները հիմնված են ԵՄ ՀԸԳՀ ճանապարհային քարտեզի նորացման հանձնարարականների վրա, ինչպես նաև ՄԱԿ-ի «Կայուն զարգացման օրակարգ 2030»-ի նպատակների և «Քաղաքաշինության մասին» օրենքի պահանջների վրա։ 2025թ. նախատեսվում է 7 մասնագիտական փաստաթղթերի գնման գործընթաց, որի 30%-ը (67.5 մլն դրամ) կֆինանսավորվի կանխավճարով։

1. Գյուղտեխնիկայի լիզինգի ծրագրի ընդլայնում՝ խոշոր ներդրումների համար

Գործող գյուղատնտեսական տեխնիկայի լիզինգի աջակցության ծրագրում սահմանվել է նոր շեմ՝ մեկ շահառուի կողմից մինչև 500 մլն դրամ արժողությամբ տեխնիկայի ձեռքբերման հնարավորություն՝ նախկին 250 մլն-ի փոխարեն։ Այս քայլը ուղղված է խոշոր արտադրողների աջակցությանն ու տեխնոլոգիական արդիականացմանը։

Ծրագիրն ամբողջացնում է ոլորտում արդեն գործող ջերմատնային տնտեսությունների (մինչև 20 հա) և ինտենսիվ այգեգործության (մինչև 500 հա) պետական վարկային աջակցությունը։

2. Բարձրագույն կրթության և գիտության ոլորտի հիմնարար օրենսդրական փոփոխություններ

Կառավարությունը հաստատել է «Բարձրագույն կրթության և գիտության մասին» նոր օրենքի նախագիծը և հարակից 25-ից ավելի օրենքներում փոփոխությունների փաթեթ՝ ուղղված ոլորտի համաչափ զարգացմանը։

Նախագծով նախատեսվում են՝

• բուհերի և գիտահետազոտական ինստիտուտների միավորում,

• հետազոտական ցանցերի ձևավորում,

• ակադեմիական ազատությունների և շարժունության ապահովում,

• հեռավար կրթության օրենսդրական ամրագրում,

• կրթության արտահանման խթանում։

Ժաննա Անդրեասյանի հավաստմամբ՝ նոր կարգավորումները կստեղծեն հեռավար կրթության որակյալ և վերահսկելի դաշտ։

3. Տրանսպորտային գրանցումների և վարորդական վկայականների թվայնացում

Օրենսդրական նախաձեռնությամբ նախատեսվում է վարորդական և հաշվառման վկայականների թվային տարբերակների տրամադրում՝ առանց ֆիզիկական փաստաթղթի։ Արժեքը կլինի նույնը, ինչ ֆիզիկական ձևաչափի համար։

Նախատեսվում է նաև՝

• տրանսպորտային միջոցների պետական հաշվառման ամբողջական թվայնացում,

• վարորդական որակավորման քննության արտահերթ մասնակցության հնարավորություն՝ վճարովի հիմունքներով (30,000–45,000 դրամ),

• քննությունների կառավարման բարելավում՝ կրթական բաղադրիչի ուժեղացմամբ։

4. Մարդու պապիլոմավիրուսի դեմ պատվաստումների սխեմայի փոփոխություն

Հաշվի առնելով ԱՀԿ վերջին դիրքորոշումը՝ որոշվել է մարդու պապիլոմավիրուսային վարակի դեմ պատվաստումները իրականացնել մեկ դեղաչափով, որը համարժեք է նախկին 2 դեղաչափի արդյունավետությանը։ Սա կբարելավի պատվաստումների հասանելիությունը և ծածկույթը։

5. Ներդրումային ծրագրերի խթանում՝ մաքսային արտոնություններով

Երեք ընկերություն՝ «ՊՐՈՄ ՍԻՆԹԵԶ ԳՐՈՒՊ», «ԱՐԻԱՆ ԼԱԲԱՆ ԱՐՄԵՆԻԱՆ ԳՌՈՒՊ» և «ԼԻԻ ԴԵԼՅՈՒՔՍ», ստանալու են արտոնություններ՝ ներմուծման մաքսատուրքից ազատման տեսքով։ Նրանց գործունեության ոլորտներն են՝ պոլիմերային արտադրանք, կաթնամթերք և շոկոլադ։

6. Դիլիջանի թունելի փոխարեն՝ նոր թունելի կառուցման նախագիծ

Վանաձոր-Բագրատաշեն միջպետական ճանապարհի բարելավման ծրագրի շրջանակում որոշվել է Դիլիջանի թունելի հիմնանորոգման փոխարեն մշակել նոր թունելի կառուցման նախագիծ։ Դրա անհրաժեշտությունը առաջացել է՝ հաշվի առնելով բնական աղետների ազդեցությունը և նախագծման խոչընդոտները։ Վարկային համաձայնագիրը երկարաձգվել է մինչև 2025թ․ վերջ։

7. Վարժական հավաքներից խուսափելու դեպքերի օրենսդրական հստակեցում

Կառավարությունը սահմանել է պատասխանատվության հստակ ձևակերպումներ այն քաղաքացիների համար, ովքեր խուսափում են վարժական հավաքներին մասնակցելուց։ Փաթեթը նաև ամրապնդում է ռազմական ոստիկանության լիազորությունները՝ նման դեպքերում գործելու համար։

8. Սահմանային վերահսկողության թվային համակարգի ամրագրում

Օրենսդրական փոփոխությամբ ամրագրվում է ՍԷԿՏ համակարգի կիրառումը պետական սահմանի վերահսկողության նպատակով։ Նշվում է՝ տվյալների մուտքագրման կարգը, լիազորված մարմնի գործառույթները և ենթաօրենսդրական կարգավորման հարցերը։

9. Շինարարության տեխնիկական հսկողության որակի բարձրացում

Այն կազմակերպությունները, որոնք պետության մասնակցությամբ են հիմնադրված և իրականացնում են խոշոր շինարարական նախագծեր, ստանալու են հնարավորություն՝ առաջին դասի լիցենզիա ստանալու շինարարության տեխնիկական հսկողություն իրականացնելու համար։ Սա կբարելավի որակի վերահսկումը առանց արտաքին կազմակերպությունների կախվածության։

10. Կարկտապաշտպան ցանցերի ներդրման նոր մեխանիզմ

Կարկտի ակտիվ գոտիներում կշարունակվի 75% փոխհատուցման ձևաչափը, իսկ այլ բնակավայրերում սահմանվել է 50%։ Միաժամանակ, թույլատրվում է մի քանի կապալառուի ներգրավմամբ ծրագրի իրականացում՝ մեծածավալ ներդրումների դեպքում։ Նման մոտեցում կիրառվել է նաև ջերմատնային տնտեսությունների ծրագրում։

11. Ապրանքների դրոշմավորման համակարգի կատարելագործում

Կիրականացվի փոփոխություն Հարկային օրենսգրքում՝ ուղղված ապրանքների նույնականացման միջոցներով դրոշմավորման համակարգի ամբողջականության ապահովմանը։ Սա կբարձրացնի հարկային մարմինների վերահսկողական գործիքների արդյունավետությունն ու կնպաստի իրավախախտումների բացահայտմանը։