Արհեստական ինտելեկտի տեխնոլոգիաների ներդրումը, ամենայն հավանականությամբ, կհանգեցնի աշխարհում զբաղվածության աճին, ոչ թե նվազմանը: Այս մասին ասվում է Ժնևում հրապարակված Աշխատանքի միջազգային կազմակերպության (ԱՄԿ) զեկույցում,- գրում է b24am-ը:
Գեներատիվ արհեստական ինտելեկտն ավելի հավանական է, որ թվային առումով ավելացնի, քան կրճատի աշխատատեղերը: Փորձագետների կարծիքով` աշխատատեղերի մեծ մասը կարող է միայն մասամբ ավտոմատացվել։
«Այսպիսով, այս տեխնոլոգիայի ամենամեծ ազդեցությունը, ամենայն հավանականությամբ, կլինի ոչ թե աշխատատեղերի վերացման, այլ դրանց որակի հնարավոր փոփոխության, հատկապես աշխատանքի ինտենսիվության և ինքնավարության վրա», – ընդգծվում է ուսումնասիրության մեջ:
Մեկ շնչին ընկնող բարձր եկամուտ ունեցող երկրներում բոլոր զբաղված մարդկանց մոտ 5.5%-ն աշխատում է այնպիսի աշխատատեղերում, որոնց վրա կարող է ազդել գեներատիվ արհեստական ինտելեկտի զարգացումը: Ցածր եկամուտ ունեցող երկրներում ավտոմատացման ռիսկն ազդում է աշխատատեղերի միայն մոտ 0.4%-ի վրա։ Աշխատատեղերի աճի ներուժը գրեթե նույնն է բոլոր երկրներում, և դա ստիպել է զեկույցի հեղինակներին արձանագրել, որ ճիշտ քաղաքականության դեպքում տեխնոլոգիական վերափոխման նոր ալիքը կարող է նշանակալի օգուտներ բերել զարգացող երկրներին:
