Porsche-ը ներկայացրել է նոր Cayenne քրոսովերը

Porsche-ն կատարելագործել է իր շքեղ ամենագնացը. նոր Cayenne-ը ներկայանում է թվայնացված էկրանով եւ կառավարման հայեցակարգով, շասսիի նոր տեխնոլոգիայով ու նորարարական առանձնահատկություններով:

«Սա Porsche-ի պատմության մեջ արտադրանքի ամենալայնածավալ արդիականացումներից է», — ասել է Cayenne-ի գծով փոխնախագահ Մայքլ Շետցլը:

Արդիականացված դիզայնով եւ ավելի հզոր շարժիչով Cayenne-ն իր սեգմենտի ամենասպորտային մեքենան դառնալու հայտ է ներկայացնում։

Նոր Porsche Cayenne-ը հնարավոր է գերազանց վարել բոլոր իրավիճակներում: Զգալիորեն բարելավել է հարմարավետությունը դանդաղ ընթացքի դեպքում, ինչպես նաեւ մեքենայի կառավարումը ոլորաններում:

Porsche նոր Cayenne-ի մեջ ինտեգրել է ամբողջությամբ վերափոխված էկրան եւ կառավարման հայեցակարգ: Վարորդի վրա կենտրոնացած՝ կառավարման ամենակարեւոր տարրերը խմբավորված են ղեկի շուրջը, ինչը մեքենան վարելիս ստեղծում է նոր, ավելի հարուստ զգացողություններ:

Նոր Porsche Driver Experience-ը, որն առաջին անգամ ներկայացվել է Porsche Taycan-ում, առանձնանում է թվային եւ անալոգային տարրերի միջեւ ճիշտ հավասարակշռությամբ։

Նոր Cayenne-ն այժմ առանձնահատուկ արտահայտիչ տեսք ունի։ Porsche-ն վերափոխել է առջեւի հատվածը՝ կոր թեւերը, նոր «կապոտը» եւ տեխնիկապես առաջադեմ ու գրավիչ լուսարձակներն ընդգծում են մեքենայի լայնությունը:

Երեք նոր գույնով եւ 20, 21 եւ 22 դյույմանոց անիվների լայն տեսականիով՝ վարորդները հնարավորություն ունեն անհատական կերպով ստեղծելու իրենց նոր Cayenne-ը:

HD Matrix LED լուսարձակները նոր լրացուցիչ առանձնահատկություն են: Լույսի հարմարեցված ռեժիմները մեծացնում են անվտանգությունն ու հարմարավետությունը տարբեր իրավիճակներում վարելու համար:

Եվրոպայում նոր Cayenne-ը ներկայանալու է երեք տարբեր շարժիչով:

Porsche-ի կողմից մշակված չորս լիտրանոց V8 բի-տուրբո կատարելագործված շարժիչը նոր Cayenne S-ում փոխարինում է նախորդ V6 շարժիչին:

Այն հասցնում է SUV եւ SUV Coupé-ի արագությունը մինչեւ 100 կմ/ժ՝ 4,7 վայրկյանում: Առավելագույն արագությունը 273 կմ/ժ է։