2022 թվականի սկզբից մոլորակի ամենահարուստ մարդու ՝ ամերիկացի գործարար Իլոն Մասկի կարողությունը նվազել է ավելի քան հարյուր միլիարդ դոլարով։ Այս մասին գրում է Bloomberg-ը ՝ հղում կատարելով սեփական հաշվարկներին։
Tesla-ի և SpaceX-ի հիմնադիրն այս ընթացքում կորցրել է 100,5 միլիարդ դոլար, ինչը ամենամեծ անկումն է գործակալության միլիարդատերերի ինդեքսի ցանկացած անդամի համար: Միայն երկուշաբթի օրը ՝ նոյեմբերի 21-ին, կորցրեց 8,6 մլրդ դոլար, ինչը պայմանավորված էր Tesla-ի բաժնետոմսերի վատթարագույն անկմամբ ՝ հասնելով երկու տարվա նվազագույնին:
Մասկը ունի 170 միլիարդ դոլար կարողություն ՝ վարկանիշի առաջին հորիզոնականում մնալու համար։ Այնուամենայնիվ, նրա առաջատարությունը Louis Vuitton Moët Hennessy ընկերությունների խմբի նախագահ Բեռնար Առնոյի նկատմամբ կրճատվել է մինչև 13 միլիարդ դոլար:
Անցյալ տարվա նոյեմբերի սկզբին Մասկի կարողությունը հասել էր 340 մլրդ դոլարի, ինչը պատմության մեջ բացարձակ ռեկորդ էր, սակայն հետո նրա ակտիվների կապիտալիզացիան սկսեց նվազել։ Վերջին շրջանում Մասկի ակտիվների հիմնական խնդիրներից մեկը Twitter սոցիալական ցանցի գնումն էր։ Ներդրողները սկսեցին կասկածել, որ գործարարի հետաքրքրությունը նոր ակտիվի նկատմամբ նվազեցնում է մնացածի կառավարման որակը։
Մասամբ նրանց ենթադրությունը հաստատել է անձամբ Մասկը։ Ինդոնեզիայում B20 բիզնես ֆորումում ելույթի ժամանակ (G20-ի երկրների ներկայացուցիչների հանդիպմանն ընդառաջ) նա դժգոհեց, որ աշխատում է առավոտից երեկո, բայց դժվարանում է հաղթահարել իր առջեւ դրված խնդիրները։
Մեկնաբանություն