Առցանց առևտրի ռուսական հարթակներում արտասահմանյան արտադրության էլեկտրոնիկայի կեղծված տարբերակների մասնաբաժինը մեկ տարվա ընթացքում կրկնապատկվել է և այժմ սմարթֆոնների և նոութբուքների սեգմենտում այն կազմում է առնվազն 30%, իսկ խելացի ժամացույցների դեպքում՝63%, այս մասին հայտնում է ռուսական «Կոմերսանտ» պարբերականը՝ վկայակոչելով IQ Technology իրավաբանական գործակալության տվյալները, որը պաշտպանում է Ռուսաստանում տեխնոլոգիական ապրանքանիշների շահերը։ Ընդորում, կեղծված ապրանքներից ամենատարածվածը Samsung-ի և Apple-ի արտադրության էլեկտրատեխնիկան է։ Առցանց առևտրի հարթակները կտրականապես համաձայն չեն ներկայացված վիճակագրության հետ,- գրում է News.am Tech-ը:
IQ Technology-ը փորձագետները վերլուծել են Ozon-ի, Wildberries-ի, Yandex.Market-ի, Sbermegamarket-ի և AliExpress-ի 15,000 անուն ապրանք և պարզել, որ 2022-ի հուլիսից մինչև 2023-ի հուլիսը կեղծ էլեկտրոնիկայի մասնաբաժինը ամենատարածված սեգմենտներում գրեթե կրկնապատկվել է, իսկ երբեմն էլ՝ ավելին։ Օրինակ, եթե դեռ 2022-ին կեղծ սմարթֆոնները կազմում էին մատակարարվող սմարթֆոնների 12%-ը, ապա այժմ կեղծ ապրանքների մասնաբաժինը հասել է 31%-ի։ Նման իրավիճակ է նաև նոութբուքների (22-ից դարձել է 31%), խելացի ժամացույցների (35-ից դարձել է 63%) և ականջակալների/բարձրախոսների (27-ից դարձել է 69%) սեգմենտում։ Կենցաղային տեխնիկայի ավելի փոքր ապրանքներն սկսել են ավելի ակտիվ վաճառվել. դրանց մասնաբաժինը 15-ից հասել է 34%-ի:
Ըստ IQ Technology-ի՝ սմարթֆոնների շրջանում ամենից հաճախ կեղծվում են Apple-ի, Samsung-ի և Xiaomi-ի արտադրանքները։ Թեև կեղծված տարբերակները նման են բնօրինակներին, դրանք տարբերվում են չափերով և այլ բնութագրերով, որպես կանոն, սարքերն ավելի ցածրորակ են, ունեն ավելի վատ սարքային մասեր և փաթեթավորում, իսկ կեղծ iPhone-ում iOS-ի փոխարեն օգտագործվում է Android-ը։ Հայտնի է, որ կեղծ տարբերակներ են արտադրվում, օրինակ, Պակիստանում, Չինաստանում, Հնդկաստանում։
Միևնույն ժամանակ, առցանց շուկաների ներկայացուցիչները պնդում են, որ իրենք հետևում են, որպեսզի կեղծ ապրանքներ չվաճառվեն իրենց հարթակներում և դրա համար նույնիսկ նեյրոցանցեր են կիրառում։ Օրինակ՝ Wildberries-ը պնդում է, որ գործարքները վերահսկվում են իրական ժամանակում, և նախքան գնման վերջնական որոշում կայացնելը, գնորդն իրավունք ունի ծանոթանալու ինչպես ապրանքների, այնպես էլ վաճառողների վարկանիշի հետ: AKIT ասոցիացիան, որի կազմում են մտնում Wildberries-ը, Ozon-ը, DNS-ը և այլ ընկերություններ, պնդում է, որ կեղծ ապրանքների մասնաբաժինը շուկաներում չի գերազանցում 0,1%-ը։
Ընդորում, որոշ հարթակներ հրաժարվել են մեկնաբանել իրավիճակը։ Այնուամենայնիվ, շուկաներից մեկի անանուն ներկայացուցիչը պարզաբանել է, որ սպառողների իրավունքների մասին օրենքի փոփոխությունները, որոնք ընդունվել են 2018-ին, որոնք օրենքում ավելացրել են «համացանցում ապրանքների ագրեգատոր» հասկացության սահմանումը, արգելում են վաճառողների ապրանքների նկարագրությանը միջամտելը: «Եթե առցանց առևտրի հարթակը ապրանքի նկարագրության մեջ փոխի կամ հանի «բնօրինակ» բառը, ապա դրանով կստանձնի ապրանքի նկատմամբ պատասխանատվությունը, ինչը ոչ ոք չի ցանկանում անել»,- նրա խոսքերն է մեջբերում «Կոմերսանտ»-ը։
Պարբերականը նաև նշում է, որ եթե նախկինում հեղինակային իրավունքի սեփականատերերն իրենք էին շահագրգռված ապրանքանիշների պաշտպանությամբ և ակտիվորեն պայքարում էին կեղծիքների դեմ, ապա այժմ որոշ դեպքերում նման պաշտպանությամբ զբաղվող պարզապես չկա, քանի որ շատ ընկերություններ լքել են Ռուսաստանը, և կեղծ ապրանքներ վաճառողներն այլևս չեն վախենում դրանց կողմից հետապնդվելուց։
Մեկնաբանություն