Տնտեսական դաշտում և միջազգային շուկաներում շարունակվում են կարևոր զարգացումները։ Հայաստանում տնտեսական ակտիվության ցուցանիշն աճել է, իսկ ներքին ապրանքաշրջանառությունը 17 տոկոսով գերազանցել է նախորդ տարվա ցուցանիշը։ Միաժամանակ, Թուրքիայում գնաճի կանխատեսումը բարձրացվել է, մինչդեռ Toyota-ն ընդլայնում է էլեկտրական ավտոմեքենաների արտադրությունը։
1. Հայաստանում տնտեսական ակտիվությունը դեկտեմբերի ընթացքում աճել է 22.7%-ով
2024-ի դեկտեմբերին տնտեսական ակտիվության ցուցանիշը նախորդ ամսվա համեմատ աճել է 22.7%-ով։ Արդյունաբերական արտադրանքի ծավալն էլ մեկամյա կտրվածքով 4.7%-ով գերազանցել է 2023-ի ցուցանիշը՝ կազմելով մոտ 3 տրլն դրամ։ Աճ է գրանցվել նաև գյուղատնտեսության, շինարարության և առևտրի ոլորտներում։
2. Կպարզեցվի Սևանա լճում ձկան և խեցգետնի արդյունագործական որսի կազմակերպման գործընթացը
Կպարզեցվի Սևանա լճում ձկան և խեցգետնի արդյունագործական որսի կազմակերպման գործընթացը։ Հայտերի ընդունման համար նախատեսված է 10 օր, որից հետո ևս 3 օր նախատեսված է պայմանագրերի կնքման գործընթացին։ Հայտերը ընդունվում և ուսումնասիրվում են նախապես, որից հետո ձկան չափաքանակները հաստատող իրավական ակտի ընդունումից հետո լիազոր մարմնի կողմից իրականացվում է պայմանագրերի կնքման գործընթաց։
3. Հայաստանում ներքին ապրանքաշրջանառությունը 2024-ին աճել է 17%-ով
2024-ին ՀՀ ներքին ապրանքաշրջանառությունը կազմել է 6,38 տրլն դրամ՝ 17%-ով գերազանցելով նախորդ տարվա ցուցանիշը։ Մեծածախ առևտրաշրջանառությունը կազմել է 4,18 տրլն դրամ։
4. ՓՄՁ-ների հարկման նոր կարգավորումներն ու ազդեցությունը
Փետրվարի 7-ին Ազգային ժողովի տնտեսական հարցերի հանձնաժողովը քննարկել է ՓՄՁ-ների համար նախատեսվող հարկային փոփոխությունները։ 2025-ից շրջանառության հարկի դրույքաչափը 5%-ից կբարձրանա մինչև 10%, եթե ապրանքների փաստաթղթային ձևակերպում չկա, իսկ փաստաթղթավորման դեպքում կկիրառվի 1% հարկ՝ նախկին 1.5%-ի փոխարեն։
5. ԶՊՄԿ-ն հայտնում է ֆինանսական մեծ վնասի մասին
Մեկ շաբաթ տևած խափանումների պատճառով ԶՊՄԿ-ն օրական կրել է մոտ 400 մլն դրամի վնաս, մինչդեռ պետության հարկային վնասը կազմել է 100 մլն դրամից ավել։ Ընկերության ներկայացուցիչները հայտարարում են, որ այս իրադարձությունները բացասաբար են անդրադարձել հազարավոր աշխատակիցների վրա։
6. Թուրքիայի ԿԲ-ն բարձրացրել է գնաճի կանխատեսումը
Թուրքիայի Կենտրոնական բանկը 2025-ի վերջի գնաճի կանխատեսումը 21%-ից բարձրացրել է մինչև 24%։ Հունվարի տվյալներով երկրի տարեկան գնաճը կազմել է 42.12%, որը գերազանցել է նախորդ կանխատեսումները։
7. Toyota-ն Շանհայում նոր գործարան կկառուցի
Toyota-ն հայտարարում է, որ Շանհայում կկառուցի նոր գործարան իր Lexus ապրանքանիշի էլեկտրական մեքենաների արտադրության համար։ Ընկերությունը նախատեսում է 1000 նոր աշխատատեղ ստեղծել, իսկ գործարանի տարեկան արտադրողականությունը կկազմի 100,000 մեքենա։
8. Amazon-ը 2025-ին 100 միլիարդ դոլար կներդնի AI տեխնոլոգիաներում
Amazon-ը նախատեսում է 2025-ին 100 միլիարդ դոլարի ներդրում կատարել արհեստական բանականության զարգացման համար՝ գերազանցելով Alphabet-ի և Microsoft-ի ներդրումները։ Գումարի մեծ մասն ուղղվելու է Amazon Web Services ամպային հարթակին։
9. Վրացական գինու արտահանման եկամուտն աճել է
2024-ին վրացական գինու արտահանման եկամուտը հասել է 274.7 մլն դոլարի։ Արտահանված գինու ծավալը կազմել է 94,564 տոննա, իսկ առանց հարկերի մեկ լիտրի միջին արժեքը՝ 2.9 դոլար։ Ռուսաստանը շարունակում է մնալ վրացական գինու հիմնական շուկան։
