Ռուսական գազի դիմաց Հայաստանն առաջիններից է սկսել վճարել ռուբլիով

Հայաստանը ռուսական գազի դիմաց սկսել է վճարել ռուբլիով, -RBC-ին տված հարցազրույցում ասել է  էկոնոմիկայի նախարար Վահան Քերոբյանը։ Գինը դոլարով է, սակայն վճարումները կատարվում են ռուբլիով։ «Որքան գիտեմ, վերջին մի քանի վճարումները ռուբլիով են եղել, բայց համապատասխան փոխարժեքով»,- պարզաբանել է նա։
«Գազպրոմի» մամուլի քարտուղար Սերգեյ Կուպրիյանովի խոսքով ՝ Հայաստանի հետ պայմանագիրն արդեն մի քանի տարի թույլ է տալիս գազի դիմաց վճարել ռուբլիով, «և այդ հնարավորությունն օգտագործվում է»։ «Գազպրոմը» Հայաստանին բնական գազի միակ մատակարարն է, իսկ Հայաստանի գազահաղորդման համակարգի օպերատորը նրա դուստր ձեռնարկությունն է։ Ռուսական գազի գինը Հայաստանի համար կազմում է 165 դոլար 1000 խմ-ի դիմաց։

Հիշեցնենք, որ մարտի վերջին, Ուկրաինայում սկսված ռազմական գործողությունների արդյունքում Ռուսաստանի դեմ սահմանված պատժամիջոցների ֆոնին, ՌԴ նախագահ Վլադիմիր Պուտինը հրամանագիր է ստորագրել «ոչ բարեկամ երկրներին» գազը ռուբլիով վաճառելու մասին։ Գազի դիմաց վճարելու համար արևմտյան երկրները ստիպված կլինեն ռուբլիով հաշիվներ բացել Գազպրոմբանկի հետ։ Ապրիլի սկզբին Բելառուսը «Գազպրոմի» հետ համաձայնագրում փոփոխություններ է ստորագրել ՝ նախատեսելով անցում կատարել ռուբլու։