Neuralink ընկերությունն արդեն իր առաջին բուժառուի գլխուղեղում տեղադրել է իր նեյրոչիպը, որը թույլ կտա մարդուն համակարգչային սարքեր օգտագործել մտքի օգնությամբ, X սոցցանցում գրել է Neuralink-ի հիմնադիր Իլոն Մասկը։
«Երեկ առաջին մարդն ստացել է Neuralink-ի իմպլանտը և լավ է ապաքինվում»,- գրել է նա՝ հավելելով, որ նախնական տվյալները խոստումնալից արդյունքներ են խոստանում։
Մեկ այլ գրառմամբ Մասկը նշել է, որ նոր արտադրանքը կոչվում է Telepathy, որի շնորհիվ մարդը կարող է ուղղակի մտքի ուժով կառավարել իր հեռախոսը, համակարգիչը կամ այլ սարքեր։
Neuralink նախագիծը մեկնարկել է 2016-ին։ Սարքը, որն ունակ է ուղեղի ազդանշաններ փոխանցել Bluetooth-ի միջոցով, ընկերությունն առաջին անգամ ցուցադրել է 2019-ի հուլիսին։
Անցյալ տարվա սեպտեմբերին ընկերությունն սկսել էր հավաքել կամավոր մասնակիցների՝ իմպլանտները փորձարկելու համար: Neuralink-ը բացատրել էր, որ այս փուլում իրենք կգնահատեն չիպի (թելերի տեսքով) և վիրաբուժական ռոբոտի անվտանգությունը, որով այն տեղադրվում է։ Ենթադրվում էր, որ թելերը պետք է տեղադրվեին ուղեղի այն հատվածում, որը վերահսկում է շարժումը։ Մասկը նշել էր, որ թեստավորման համար կընտրվեն միայն նրանք, ովքեր կորցրել են տեսողությունը, լսողությունը և խոսելու ունակությունը։
Մինչ այս ուսումնասիրություններ են կատարվել կենդանիների վրա։ Օրինակ՝ 2021-ին ընկերությունը ցուցադրել էր տեսահոլովակ, թե ինչպես է Պեյջեր անունով մակակա կապիկը տեսախաղեր խաղում՝ շնորհիվ նրա ուղեղում տեղադրված չիպի: Ընկերությունը սկզբում մարդու վրա փորձարկումները ցանկանում էր անել մինչև 2019-ի վերջը, սակայն թույլտվությունը ստացել է միայն 2023-ին։
Մեկնաբանություն