Թուրքիայի նախագահ Ռեջեփ Թայիփ Էրդողանը հայտարարել է, որ եթե Հայաստանը խոչընդոտի «Զանգեզուրի միջանցքը» բացելուն, այն կարող է անցնել Իրանով, հայտնում է ադրբեջանական APA-ն։
Նա հավելել է, որ Իրանն այժմ դրական է դրան վերաբերվում։
«Մյուս կողմից, մեր այցը Նախիջևան ևս մեկ հիշեցում է թուրք–ադրբեջանական եղբայրության մասին, հայտարարություն աշխարհին այն մասին, որ մենք «մեկ ազգ, երկու պետություն ենք»,–ասել է նա։
Նա հավելել է, որ Նախիջևանի և Ադրբեջանի մյուս շրջանների հետ ցամաքային, երկաթուղային կապի հաստատումն էլ ավելի կամրապնդի երկրների հարաբերությունները։
«Մենք ամեն ինչ կանենք, որպեսզի այդ միջանցքը որքան հնարավոր է շուտ բացվի։ Այդ միջանցքի բացումը շատ կարևոր է Թուրքիայի և Ադրբեջանի համար, կրում է ռազմավարական բնույթ և պետք է ավարտին հասցվի։ Երբ այդ միջանցքը բացվի, Բաքվից մեկնող ավտոմեքենաներն ու գնացքները կժամանեն ուղիղ Կարս։ Թուրք–ադրբեջանական եղբայրությունն էլ ավելի կամրապնդվի։ Ուրախալի է, որ Իրանից էլ են դրական ազդակներ գալիս այդ առումով»,–ասել է Էրդողանը։
Հայաստանի իշխանությունները մշտապես բոլոր հարթակներում կրկնում են, որ միջանցքային տրամաբանությամբ հարց չեն քննարկում և չեն քննարկի, սակայն կողմ են ճանապարհների բացմանը։
