Մասկը հայտարարել է արհեստական բանականությամբ զբաղվող նոր ընկերություն ստեղծելու մասին

Ամերիկացի միլիարդատեր և ձեռնարկատեր Իլոն Մասկը Twitter-ի իր էջում հայտարարել է xAI անունով նոր ընկերության ստեղծման մասին, որը կզբաղվի արհեստական բանականության զարգացմամբ,- գրում է News.am Tech-ը։

«Հայտարարում ենք xAI-ի ձևավորման մասին՝ իրականությունը հասկանալու համար»,- գրել է Մասկը։

Ապրիլին Financial Times-ը, հղում անելով աղբյուրներին, հայտնել էր, որ Մասկը նախատեսում է թողարկել արհեստական բանականությամբ զբաղվող իր սեփական ստարտափը։ Ըստ նախագծի կայքի՝ xAI-ն առանձին ընկերություն է, սակայն սերտորեն համագործակցելու է X Corp.-ի (Twitter), Tesla-ի և մյուսների հետ՝ «տիեզերքի իրական էությունը հասկանալու» իրենց առաքելության մեջ առաջընթաց գրանցելու համար:

Նաև, ըստ կայքի տվյալների, Մասկի xAI թիմը ներառում է նաև մի շարք ԱԲ փորձագետներ, որոնք աշխատել են այնպիսի նախագծերի վրա, ինչպիսիք են GPT-3.5-ն և GPT-4-ը, AlphaStar-ը, AlphaCode-ը, Inception-ը և Minerva-ն։

Նշվում է, որ հուլիսի 14-ին Twitter Spaces-ում տեղի կունենա զրույց, որի ընթացքում օգտատերերը կկարողանան իրենց հարցերն ուղղել xAI թիմին։