Արմենիա հեռուստաընկերությունը հայկական հեռուստաեթերում առաջին անգամ ներկայացնում է նոր ձևաչափ: «Կինոպարկ»-ում տեղի է ունեցել «Գիտունոիդ» առաջին հայկական գիտքոմի (գիտական քոմեդի) փակ դիտումը:
Արմենիա Հ/Ը նոր նախագիծը՝ «Գիտունոիդ»-ը դառնալու է դպրոցականների հեռուստաընկերը և երեխաներին տեղափոխելու է անիմացիոն աշխարհ՝ մասնակից դառնալու գիտապտույտին:
Մանկական ճանաչողական-ժամանցային նախագիծը պատմում է այլմոլորակային կայսրության արքայազն Բետելգերնորապեքս 398-րդի մասին, որի աստղաթիռը վթարային վայրէջք է կատարում Երկիր մոլորակի վրա, մասնավորապես՝ Լևոնյանների տան մոտակայքում: Պարզվում է, որ միջգալակտիկական հյուրն ամեն բան գիտի մեր մոլորակի մասին:
Բացառիկ գիտելիքների համար նոր ընկերները՝ Արտեմն ու Գիսանեն, նրան կոչում են Գիտունոիդ: Այլմոլորակային հյուրի օգնությամբ երեխաները յուրաքանչյուր սերիայում գիտապտույտով հայտնվում են անիմացիոն աշխարհում և ավելին իմանում որևէ երևույթի մասին. ինչպե՞ս է գործում մարդու օրգանիզմը, ի՞նչ է ֆոտոսինթեզը, ինչպե՞ս են կառուցվել եգիպտական բուրգերը և այլն: Նախագիծը Արմենիա Հ/Ը եթերում կլինի սեպտեմբերի 3-ից:
Դերասանական կազմում են Անահիտ Կիրակոսյանը, Իշխան Ղարիբյանը, Մհեր Գրիգորյանը, Լիլիթ Թոխատյանը, Վահագն Գասպարյան և այլոք:
Նախագծի պրոդյուսերը Ռոբերտ Մարիտիրոսյանն է, սցենարիստները Վահան Մովսեսյանը, Ջեյմս Նազարյանը, Խորեն Թևանյանը, ռեժիսորը Կարեն Ամյանն է: Նախագծի գաղափարի հեղինակը և անիմացիոն հատվածի պատասխանատուն «Մեդիա սթրիմ» գործակալությունն ու «L17» անիմացիոն ստուդիան են:
Մեկնաբանություն