«Հայաստանի էլեկտրական ցանցեր» ընկերությունը շարունակում է բաշխիչ ցանցի վերազինմանն ու վերակառուցմանն ուղղված իր ներդրումային ծրագրերը:
Խոշոր ծրագրերից են Ծաղկաձորի, Սպիտակի ու Գյումրու ենթակայանների արդիականացումը: Մարզային ենթակայանների վերազինմանը կուղղվի ավելի քան 2 մլրդ դրամ:
Ընդհանուր առմամբ 8 տարիների ընթացքում՝ 2016-ից 2024 թվականներին, «Հայաստանի էլեկտրական ցանցեր» ընկերությունը արդիականացրել և շարունակում է վերազինել էլեկտրաէներգետիկ ենթակառուցվածքները:
ՀԷՑ-ը ժամանակակից սարքերով վերազինվելու համար այս ընթացքում ներդրել է ավելի քան 270 մլրդ դրամ:
Ծրագրի հիմնական ուղղություններն են՝
— հոսանքազրկումների միջին տևողության և հաճախականության ցուցանիշների պահպանմանը և մաշված սարքավորումների փոխարինմանն ուղղված ներդրումներ,
— թույլատրելի սահմաններից էլեկտրաէներգիայի լարման շեղման միջին տևողության և հաճախության կրճատմանն ուղղված ներդրումներ,
— նոր սպառողների միացմանը և բաշխիչ ցանցի զարգացման նպատակային ծրագրերի իրականացմանն ուղղված ներդրումներ,
— էլեկտրաէներգիայի ավտոմատացված հաշվառման ու վերահսկման համակարգի ներդրումներ և այլ ուղղություններ:
Հանրային ծառայությունները կարգավորող հանձնաժողովը հաստատել է նաև ՀԷՑ-ի՝ առաջիկա տասը տարիների՝ 2024-2034 թվականների ներդրումային ծրագիրը, որի արժեքը 305, 424 մլն դրամ է: Այս գումարն ուղղվելու է ցանցերի վերազինմանն ու արդիականացմանը, ցանցին նոր սպառողների միացմանը, առևտրային հաշվառման համակարգի և սմարթ հաշվիչների ներդրմանը:
