YouTube-ը ներկայումս մշակում է արհեստական բանականությամբ աշխատող գործիք, որը թույլ կտա օգտատերերին աուդիո ձայնագրելիս նմանակել հայտնի երաժիշտների ձայնը: Ծառայությունը ներկայումս փորձում է թույլտվություն ստանալ երաժշտությամբ զբաղվող ընկերություններից իր նեյրոցանցը նրանց երաժշտական կատալոգների երգերի վրա վարժեցնելու համար: Ձայնագրման ոչ մի խոշոր ընկերություն դեռ համաձայնություն չի տվել, սակայն, ըստ Bloomberg-ի տեղեկությունների, կողմերի միջև բանակցությունները շարունակվում են,- գրում է News.am Tech-ը:
Անցյալ ամիս YouTube-ը բովանդակություն ստեղծողների համար ներկայացրեց արհեստական բանականությամբ աշխատող մի քանի նոր գործիքներ, այդ թվում՝ նեյրոցանցով ստեղծված ֆոնային պատկերներ և տեսանյութեր: Ընկերությունը նախատեսում էր այս գովազդներում ներառել նաև հայտնի երաժիշտների ձայների կլոնավորման նոր գործիք, սակայն չկարողացավ ժամանակին թույլտվություն ստանալ հեղինակային իրավունքի սեփականատերերից։
Արհեստական բանականության ստեղծած երաժշտությունը ներկայումս իրավական տեսանկյունից գտնվում է «մոխրագույն գոտում»՝ կապված այն երգերի սեփականության իրավունքի հաստատման դժվարության հետ, որոնցում կիրառվում է կատարողի եզակի ձայնը, բայց ուղղակիորեն չեն օգտագործվում հեղինակային իրավունքով պաշտպանված տեքստը կամ աուդիոձայնագրությունները: Ներկայումս գործող օրենսդրության համաձայն՝ պարզ չէ, թե արդյոք ձայնագրման ստուդիայի երաժշտական կատալոգի ձայները կլոնավորելու նպատակով գեներատիվ արհեստական բանականության ուսուցումը հեղինակային իրավունքի խախտում է: Այնուամենայնիվ, դա չի նվազեցրել հետաքրքրությունը «երաժշտական» նեյրոցանցերի զարգացման և վարժեցման նկատմամբ. այս տարի Meta-ն, Google-ը և Stability AI-ը թողարկել են երաժշտություն ստեղծելու արհեստական բանականության գործիքներ:
YouTube-ը դիրքավորվում է որպես գործընկեր՝ օգնելու ոլորտին առաջ շարժվել գեներատիվ արհեստական բանականության տեխնոլոգիայով, ինչը երաժշտությամբ զբաղվող ընկերությունները ողջունում են, նշում է Bloomberg-ը: Չնայած Alphabet-ը վերջին մեկ տարվա ընթացքում ագրեսիվորեն առաջ է մղել գեներատիվ արհեստական բանականության ոլորտում իր մշակումները, դեռ չի կարելի ասել, որ այն կկարողանա օրինական կերպով տրամադրել արհեստական բանականության միջոցով ձայնը կլոնավորելու գործիքներ YouTube-ում բովանդակություն ստեղծողներին և կկարողանա խուսափել հեղինակային իրավունքի խախտման վերաբերյալ բազմաթիվ հայցերից։
Առայժմ պարզ չէ, թե արդյոք արհեստական բանականությամբ ձայնի կլոնավորման YouTube-ի այս գործիքի վերաբերյալ քննարկումները կօգնեն լուծել ձայնագրման ստուդիաների հեղինակային իրավունքի խախտման հետ կապված բողոքների հարցը արհեստական բանականության ստեղծած երգերի աճի ֆոնին, որոնք նմանակում են հայտնի երաժիշտներին: Այս խնդիրը լայն տարածում գտավ տարվա սկզբին, երբ Drake-ի արհեստական բանականությամբ ստեղծված երգը համացանցում լայն տարածում ունեցավ: Մինչ որոշ երաժիշտներ, ինչպիսիք են Գրայմսը (Grimes), աջակցում են արհեստական բանականության ստեղծած երաժշտությանը, շատ ուրիշներ, այդ թվում՝ Սթինգը, Ջոն Լեջենդը և Սելենա Գոմեսը, կոչ են անում կանոնակարգեր սահմանել այս ոլորտում և պաշտպանելով իրենց ձայնը պատճենումից:
Մեկնաբանություն