Ծագման երկրից Հայաստանը դարձել է միգրանտներ ընդունող երկիր

ՆԳՆ Միգրացիայի և քաղաքացիության ծառայության պետի տեղակալ Իրինա Դավթյանը Հանրային հեռուստաընկերությանը տված հարցազրույցում ներկայացրել է ՀՀ սահմանային ելքերի և մուտքերի տարբերությունները։

Իրինա Դավթյանի խոսքով, ներկայումս ՀՀ-ում օրինական բնակության կամ կացության իրավունքի հիման վրա բնակվում է մոտ 40 000 Ռուսաստանի Դաշնության քաղաքացի։ ՌԴ քաղաքացիների ներհոսքը նկատելիորեն ավելացել է 2022 թվականից, ինչը կապված է ռուս-ուկրաինական հակամարտության հետ։

Հնդկաստանի քաղաքացիների ներհոսքը շարունակվում է՝ 2023 թվականին տրամադրվել է 29 815 մուտքի վիզա, իսկ 2024 թվականի առաջին կիսամյակի ընթացքում այդ թիվը հասել է 31 924-ի։ Կացության կարգավիճակների տրամադրման թիվը նվազել է, քանի որ ավելացել են օտարերկրացիների կացության կարգավիճակ ստանալու մերժումները։

2024 թվականի առաջին կիսամյակի ընթացքում Հնդկաստանի քաղաքացիներին տրամադրվել է ընդամենը 858 կացության կարգավիճակ։

ՀՀ քաղաքացիների սահմանահատումների պատկերը ելքերի ուղղությամբ այլ է. 2023 թվականի առաջին կիսամյակում Հայաստանից դուրս է եկել 26 հազար քաղաքացի, մինչդեռ 2024-ի առաջին կիսամյակում այս թիվը կազմել է 23 հազար։