Քաղաքաշինության ոլորտում գործող կազմակերպությունները պարտավոր են մինչև սեպտեմբերի 17-ը դիմել վերալիցենզավորման համար: Քաղաքաշինության կոմիտեն հիշեցնում է, որ հին լիցենզիաներն ու ներդիրները կդադարեցվեն նույնիսկ այն դեպքերում, երբ կազմակերպությունը հաղթող է ճանաչվել գնումների գործընթացում կամ պայմանագրերի ժամկետները լրանում են սեպտեմբերի 17-ից հետո:
2022 թվականին ընդունված օրենսդրական փոփոխությունները ուժի մեջ են մտել մեկ տարի անց, որից հետո ևս 9 ամսվա ընթացքում սահմանվել է անցումային ժամանակահատված՝ վերալիցենզավորման համար։ Այդպես, կազմակերպություններին տրվել է բավարար ժամանակ սահուն կերպով կազմակերպելու լիցենզիայի դասակարգումը, առանց քաղաքաշինական ծրագրերի ընդհատման։
Տնօրենը պետք է մուտք գործի urban.e-gov.am հարթակ՝ նույնականացման քարտի կամ բջջային նույնականացման քարտի միջոցով: Այնուհետև «Քաղաքաշինության ոլորտի լիցենզիաներ» բաժնում անհրաժեշտ է ընտրել համապատասխան ոլորտը՝ կատարված աշխատանքից և այլ չափանիշներից կախված: Լիցենզիայի ոլորտից կախված պետք է ընտրել համապատասխան ներդիրը և յուրաքանչյուրի համար լրացնել առանձին հայտ։
Հաղորդագրության համաձայն՝ առաջին անգամ լիցենզիայի դիմող կազմակերպությունները չեն կարող ստանալ 1-ին՝ բարձր դասի լիցենզիա: Նրանք կարող են դիմել միայն 3-րդ դասի լիցենզիայի կամ ներդիրի համար՝ քաղաքաշինական փաստաթղթերի կազմում և շինարարության իրականացման դեպքում:
Մյուս գործունեության տեսակների համար, ինչպիսիք են քաղաքաշինական փաստաթղթերի փորձաքննությունը, շինարարության որակի տեխնիկական հսկողությունը, և այլ ծառայություններ, տրամադրվում է 2-րդ դասի լիցենզիա կամ ներդիր։ Սկսնակ կազմակերպությունները պետք է առաջնորդվեն ՀՀ կառավարության 2023թ. նոյեմբերի 30-ի 2106-Ն որոշմամբ:
Հայտի պատասխանատու մասնագետը և ինժեներատեխնիկական անձնակազմը կարող են ներգրավվել միայն, եթե նրանց վերաբերյալ աշխատանքային պայմանագրերը գրանցված են Պետական եկամուտների կոմիտեի կողմից տրամադրված անհատական հաշվի քաղվածքում։
Տեխնիկական միջոցների ներգրավվածությունը հիմնավորելու համար անհրաժեշտ է ներկայացնել համապատասխան փաստաթղթեր, ինչպիսիք են տեխնիկական անձնագիր կամ սեփականության վկայական, հաշվառման վկայագիր կամ վարձակալության պայմանագիր:
Վերալիցենզավորման գործընթացն ամբողջությամբ իրականացվում է էլեկտրոնային հարթակում, և տրամադրված լիցենզիաները հաստատվում են QR կոդով։
Փաստաթղթերի ցանկը սահմանված է «Քաղաքաշինության բնագավառում լիցենզավորման և որակավորման կարգը հաստատելու մասին» ՀՀ կառավարության 2023թ. նոյեմբերի 30-ի 2106-Ն որոշման մեջ, որը ներառում է նաև անհրաժեշտ փաստաթղթերը լիցենզիա ստանալու համար:
Մեկնաբանություն