Հունիսի 13-ին Հայաստանի ֆոնդային բորսայի արտարժույթի հարթակում առաջին անգամ` գրեթե 10 տարի անց, տեղի է ունեցել 1,1 միլիոն ԱՄՆ դոլարի արտարժույթի փոխարկում:
Նշենք, որ արտարժույթի հարթակը գործարկվել է սույն թվականի մայիսի 2-ից, և հնարավորություն է տալիս ավելի տեսանելի և շուկայական դարձնել դրամի արժեքը արտարժույթի նկատմամբ։
Հարթակում գործարքները իրականացվում են բացառապես նախնական դեպոնացման տարբերակով և անանուն՝ ապահովելով արժութային ռիսկի կառավարումը: Հարթակի գործարկումից հետո, ՀՖԲ-ի գլխավոր տնօրեն Հայկ Եգանյանը հանդիպում է ունեցել հայկական բանկերի և ներդրումային ընկերությունների ներկայացուցիչների հետ, պատմել հարթակի հետ կապված հեռանկարների և տեխնիկական հնարավորությունների մասին:
Ինչպես գիտենք, արտարժույթի շուկան վճռորոշ դեր է խաղում փողի շուկայում՝ հեշտացնելով միջազգային գործարքները և ներդրումները, ազդելով դրամավարկային քաղաքականության վրա և ապահովելով արժութային ռիսկի կառավարման մեխանիզմ:
Արտարժույթի շուկայի ակտիվությունը հանգեցնում է բիզնեսի զարգացմանը պետության սահմաններում և նրանից դուրս։ Այն գործիք է կայունացնելու պետության դրամավարկային քաղաքականությունը և կառավարելու արտարժութային ռիսկը` հաստատուն պահելով սեփական արժույթը։ Արտարժույթի շուկայի կարևոր դերերից մեկը իրացվելիության և գնի բացահայտման ապահովումն է։
Եթե արտարժույթի շուկան բարձր իրացվելի է և արժույթի գները արտացոլում են իրական ժամանակում առաջարկի և պահանջարկի պայմանները, ապա այն օգնում է բիզնեսին և ներդրողներին տեղեկացված որոշումներ կայացնել՝ հիմնվելով արժույթի ճշգրիտ գնահատումների վրա։ Նշենք, որ արտարժույթով վերջին գործարքը Հայաստանի ֆոնդային բորսայում տեղի էր ունեցել 2016 թվականին:
AMX-ը Հայաստանում գործող միակ ֆոնդային բորսան է, որը հանդիսանում է նաև Հայաստանի կենտրոնական դեպոզիտարիայի միակ բաժնետերը: AMX խմբի առաքելությունն է նպաստել Հայաստանում բարենպաստ ներդրումային միջավայրի ձևավորմանը՝ առաջարկելով արդյունավետ լուծումներ ու ծառայություններ, այդ թվում՝ արժեթղթերի առևտրի, քլիրինգի, վերջնահաշվարկի և կենսաթոշակային համակարգի կառավարման ոլորտում:
Մեկնաբանություն