ՎԶԵԲ-ը և Ինեկոբանկը աջակցում են ապակե տարաներ արտադրող ընկերության Հայաստանում: Աջակցություն «Սարանիստ» ընկերությանը՝ աճող պահանջարկը բավարարելուն միտված ծավալների ընդլայնման նպատակով։ Համատեղ ֆինանսավորման գործիք, որը նախատեսված է տեղական բիզնեսին աջակցելու նպատակով,- գրում է b24.am-ը։
Վերակառուցման և զարգացման եվրոպական բանկը (ՎԶԵԲ) և Ինեկոբանկը «Սարանիստ» ընկերությանը միջնաժամկետ վարկ կտրամադրեն արտադրության ընդլայնման և շրջանառու միջոցների համար։
«Սարանիստ» ընկերությունը, հանդիսանալով Հայաստանում ապակե տարաների ամենամեծ արտադրողը և տարածաշրջանում ունենալով առաջատար դիրք այդ ոլորտում, տրամադրված միջոցները կօգտագործի արտադրության ծավալներն ավելացնելու նպատակով՝ օգնելու բավարարել հայաստանյան և տարածաշրջանային շուկաներում աճող պահանջարկը և այլընտրանք առաջարկել ներկրվող ավելի թանկ ապակե արտադրանքներին:
Նախագիծը առաջին գործարքն է, որը ստորագրվել է Ռիսկերի կիսման գործիքի (RSF) շրջանակներում ՎԶԵԲ-ի և Ինեկոբանկի միջև: Ռիսկերի կիսման գործիքը ՎԶԵԲ-ի Փոքր բիզնեսի նախաձեռնության հիմնական ֆինանսավորման շրջանակներից մեկն է, որը ծրագիր է՝ ուղղված տեղական մասնավոր հատվածին աջակցելուն և զարգացնելուն: Ռիսկերի կիսման մեխանիզմը տարածված ֆինանսավորման գործիք է, որը թույլ է տալիս ՎԶԵԲ-ին կիսել գործընկեր բանկերի ռիսկերը տեղական ձեռնարկություններում ներդրումներ կատարելիս՝ ֆինանսավորվող կամ չֆինանսավորվող ռիսկերի մասնակցության միջոցով:
«Մենք ուրախ ենք, որ հնարավորություն ունենք աջակցելու «Սարանիստին» իր բարձրորակ արտադրանքի տեսականին ընդլայնելու ձգտումն իրագործելու հարցում՝ բավարարելով աճող պահանջարկը և մեծապես ազդելով տարածաշրջանում ներկրման շուկաների վրա։ Ռիսկերի կիսման գործիքը լրացուցիչ ֆինանսավորման շրջանակ է, որը մենք իրականացնում ենք Ինեկոբանկի հետ համատեղ՝ հնարավորություն ունենալով հետագայում աջակցել տեղական մասնավոր բիզնեսներին, ինչը ՎԶԵԲ-ի գլխավոր առաջնահերթություններից մեկն է Հայաստանում»,- ասել է ՎԶԵԲ երևանյան գրեսանյակի ղեկավար Գեորգի Ախալկացին։
«ՎԶԵԲ-ի հետ համագործակցության այս նոր տեսակը մեր երկարամյա գործընկերության հաջող շարունակությունն է: Մենք շատ ուրախ ենք լինել Ռիսկերի կիսման գործիքի գործընկերը և, մասնավորապես, նշված գործիքի շրջանակներում առաջին պայմանագիրը կնքել «Սարանիստի» հետ, որը Հայաստանի տնտեսության մեջ իր ներդրման առումով ակնառու ընկերություն է»,- նշել է Ինեկոբանկի գործադիր տնօրեն Հայկ Ոսկանյանը։
ՎԶԵԲ-ը Հայաստանում առաջատար ինստիտուցիոնալ ներդրողներից է: Հայաստանում իր գործունեության սկզբից ի վեր այն ներդրել է շուրջ 2 միլիարդ եվրո շուրջ 206 նախագծերում՝ աջակցություն ցուցաբերելով մասնավոր հատվածի զարգացմանը և էներգետիկայի, ենթակառուցվածքների, հեռահաղորդակցության և ֆինանսական ոլորտներին:
Մեկնաբանություն