Վերջին օրերին մեծ արձագանք է ստացել 0% ներմուծման մաքսատուրքի պայմանով էլեկտրամոբիլների ներմուծման քվոտայի թեման։ Մասնավորապես, շրջանառվում է տեղեկություն, թե քվոտան ամբողջությամբ սպառվել է։ Սակայն «Ավտոարտադրողների պաշտոնական ներկայացուցիչների ասոցիացիան» (ԱՊՆԱ) հերքում է այս պնդումները՝ նշելով, որ 2025թ. մարտի 2-ի դրությամբ դեռևս հասանելի է 2534 միավոր։
Ո՞վ կարող է օգտվել 0% մաքսատուրքով ներմուծման հնարավորությունից
ՀՀ Կառավարության 2024թ. նոյեմբերի 28-ի N 1876-Ն որոշմամբ սահմանվել է, որ 2025թ. համար նախատեսված քվոտան բաժանվում է երկու խմբի՝
- 3000 միավոր՝ պաշտոնական ներկայացուցիչների համար (նրանք, ովքեր ավտոարտադրողի հետ ունեն պաշտոնական դիլերական կամ դիստրիբյուտորական պայմանագրեր)։
- Մնացած քվոտան՝ այլ տնտեսվարողների, այդ թվում՝ անհատ քաղաքացիների համար։
Այս տարանջատումը շատերի համար մոլորեցնող է դարձել, քանի որ հանրային քննարկումներում հաճախ նշվում է «ֆիզիկական» և «իրավաբանական» անձանց միջև բաշխման մասին, մինչդեռ Կառավարությունը տարբերակում է պաշտոնական ներկայացուցիչներին և մնացած ներմուծողներին։
Պաշտոնական ներկայացուցիչների պահանջները
Պաշտոնական ներկայացուցիչ դառնալու համար ներմուծող ընկերությունները պետք է ապահովեն հետևյալ պայմանները՝
Ավտոարտադրողի հետ կնքված դիլերական կամ դիստրիբյուտորական պայմանագիր,
Գործարանային երաշխիքային և հետերաշխիքային սպասարկման պայմանագիր,
Տեխնիկական սպասարկման կենտրոնների առկայություն։
Այս չափորոշիչների համապատասխանությունը ստուգվել է ՀՀ էկոնոմիկայի նախարարության կողմից, որից հետո 0% ներմուծման մաքսատուրքի իրավունք է շնորհվել մի շարք ընկերությունների, այդ թվում՝ Volvo, Kia, BMW, Nissan, Audi, Porsche, Land Rover, Mini, Chery, JAC և այլ բրենդների պաշտոնական ներկայացուցիչներին։
Մոլորություններ և իրականություն
Մոլորություն․ Քվոտան ամբողջությամբ սպառվել է։
Իրականություն․ 2025թ. մարտի 2-ի դրությամբ դեռևս հասանելի է 2534 միավոր։
Մոլորություն․ Պաշտոնական ներկայացուցիչները կարող են օգտվել նաև մնացած քվոտայից։
Իրականություն․ Պաշտոնական ներկայացուցիչների համար նախատեսված մասնաբաժինը խիստ հսկվում է Կառավարության կողմից, ուստի նրանք չեն կարող ներմուծել ավելին, քան իրենց սահմանված քվոտան։
Ինչու գնել պաշտոնական ներկայացուցիչներից
Երաշխիքային և հետերաշխիքային սպասարկում – արտադրողից ուղիղ երաշխիք, ծրագրային թարմացումներ, տեխնիկական սպասարկում։
Վերանորոգման և վերադարձի երաշխիք – արտադրական թերությունների դեպքում մեքենաները անմիջապես հետ են կանչվում և վերանորոգվում։
Ապահով գնում – մեքենաները ներմուծվում են բրենդի պաշտոնական ուղիներով՝ ապահովելով որակ և անվտանգություն։
***
Պաշտոնական ներկայացուցիչներից գնումն ապահովում է հաճախորդներին որակյալ սպասարկում, երաշխիքներ և տեխնիկական աջակցություն։ Մինչ հանրային քննարկումները շարունակվում են, կարևոր է փաստերի հիման վրա ձևավորել կարծիք և չտրվել մոլորություններին։
