Կառավարությունը հաստատել է աշնանացան ցորենի արտադրության խթանման 2022 թվականի աջակցության ծրագիրը: Ըստ դրա 1 հա աշնանացան ցորենի մշակության ծախսերի, մասնավորապես սերմի, պարարտանյութի և դիզելային վառելիքի ձեռքբերման ծախսերի մասնակի փոխհատուցման միջոցով, հավաստագրված սերմերով ցանք կատարելու դեպքում 1 հա-ի համար կտրամադրվի 120000 դրամ, իսկ չհավաստագրված սերմերով ցանքի դեպքում՝ 70000 դրամ։ Ծրագրի շահառու կարող է լինել մինչև 100 հա մակերեսով ցորենի ցանքատարածություն մշակող տնտեսավարողը, բացառություն են տնամերձ հողատարածքները: Ծրագրի ընթացքում պետք է պարտադիր ցանք կատարվի մինչև նոյեմբերի 1-ը, իսկ ցածրադիր շրջաններում եղանակից կախված, մինչև նոյեմբերի առաջին տասնօրյակը: Շահառուն փոխհատուցում ստանալու համար, ոչ ուշ քան հաջորդ տարվա ապրիլի 1-ը դիմում է ներկայացնում համայնքի կամ բնակավայրի վարչական ղեկավարին, որտեղ նշում է նաև ցորենի փաստացի ցանքատարածության տեղը, մակերեսը և հավաստագրված սերմերով ցանք կատարելու դեպքում՝ ներկայացնում նաև սերմերի հավաստագրի պատճենը: Այդ փաստաթղթերի բացակայության դեպքում շահառուն կհամարվի չհավաստագրված սերմերով ցանք կատարող։
